Lîloz Hisên/Qamişlo
Kişka Ronahî ya belavkariya rojnameyan weke xaleke hevdîtina rasterast di navbera raghandin û civakê de ye, herwiha ew derfeteke ji bo nasîna bûyer, geşdanên siyasî û çandî ye di heman demê de platformeke ji bo beşdariya civakê di raya giştî de ye.
Li nêzî çerxerêya Osman Sebrî ya bajarê Qamişlo kişeke biçûk bala mirov dikşîne, tê de rojname û pirtûkên siyasî û çandî têne firotin bi armanca belavkirina çanda xwendinê di nava civakê de ku bi taybet kategoriya ciwanan hedef digre. Mîna vê kişkê li hemû herêma Bakur û Rojhilatê Sûriyê hene weke hewildaneke herêmî ji bo belavkirina zanistê û şopandina bûyeran, xwendevanên rojnameyan rojane ji bo naskirina guhertinên li ser rûyê vê erdnîgariyê çêdibin berê xwe didin kişkê weke ciheke baweriyê ji wan re hatiye tesbît kirin.
Piştî şoreşa 19’ê Tîrmehê ku ji bajarê Kobanê sala 2012’an dest pê kir, preojeyeke demokratîk li herêma Bakur û Rojhilatê Sûriyê hate avakirin û damezirandina Rêveberiya Xweser berhmek ji têkoşîna gelê herêmê hate nîşandan, ku armanca wê avakirina civakeke azad e û civak xwe bi xwe rêve bibe. Di nava vê şoreşê de pêwistiya dengê raghandinê hebû ku dengê şoreşê derxîne cîhanê û guhertinên civakî û siyasî belge bike herwiha çanda pirrengî û hevjiyana azad xurt bike. Gelek saziyên raghandinê hatin avakirin di nav de Saziya Ronahî ya Belavkariyê ku berhemên saziyên din weke rojname, kovar û pirtûkan pêşandan dike di riya avakirina kişkan de.
Kişk bûye qadeke zanînê
Saziya Ronahî ya Belavkariyê kişkên firotina pirtûk û rojnameyan avakir li piraniya bajaran weke Qamişlo, Amûdê, Hesekê, Tirbespiyê, Rimêlan, Dêrikê û Kobanê.
Di van kişkan de jin û mêr tê de xebat dikin, çaxê sibeha dewameke û piştî nîvro dewameke din e, tê de pirtûkên çandî, siyasî, rojname û kovar herwiha pêwistiyên dibistanê têne firotin. Herwiha ew bûye weke qadek ji bo naskirina pêşketin û geşdanên siyasî û guhertinên ku di seranserî Sûriyê de çêdibin.
Tevî alternatîfên nû rojname hîn jî diaxivin
Derbarê vê mijarê xebatkara di kişka belavkariyê de kar dike Hemrîn Osman ji me re axivî û wiha got: “Gelek xwendevanên rojnameyan serdana kişka me dikin û pirsa hejmarên nû dikin. Herî zêde kesên bi temen mezin tên ji bo kirîna rojnameyan ji ber ku hîn çanda xwendinê ya kevin bi wan re heye, rêjeya xwendina ciwanan jî başe lê ne zêde ye, belê ji ber ku piraniya ciwana di serdema nû de berê xwe didin medya dîcîtal. Gelek kesên ku serdana kişkê dikin ji bo rojnameyan caranan li me vedgerin û pirsa hin gotar an jî mijarên di nava rojnameyên dikin. Bi rastî ev yek kêfxweşiyê bi me re çêdike ji ber ku tê nîşan ku hîn jî kes hene girêdana wan bi xwendinê re heye. Di kişkê de rojnameyên Serxwebûn, Rojava, Ronahi û Sûrî tên pêşandan. “
