Serbest Mêrdîn
Di çêbûn an jî avabûna civakan de rojên girîng û pîroz hene. Çend sal û dewran jî di ser re derbas bibin bila derbas bibin, ew roj girîngiya xwe wenda nakin û her tim zindî û mîna xwe dimînin.
Pir civakan ew rojên xwe bi motîfên mîtolojîk û olî neqişandine, kî zane dibe ku guman dikirin rojekê bên jibîrkirin an jî wateyên xwe wenda bikin pîrozkirin û bilindahiya wan rojan hinekî din derxistine merheleyeke jortir.
Ji bo Kurdistan û gelê Kurd jî rojek wiha heye ku têde hebûn, afirînerî û vejîna xwe dibînin. Welat û gelê ku ber bi tunebûn û helandinê ve diçû di wê rojê de zindî bû, çavên xwe vekir, toz û axa bi salan ji ser xwe avêt, rabû ser piyan û ber bi azadiyê ve kete rê. Ev roj 15’ê Tebaxê bû.
Pêngava 15’ê Tebaxê ku di pêşengiya Fermandar Egîd de dest pê kir, ji bo gelê Kurd dîrokeke nû ava kir. Gelê Kurd di aliyê leşkerî, siyaset, çand, felsefe, bîrdozî û heqîqetê de xwe nas kir.
Li hember her cureyê neheqiyan, bi awayekî rêxistinkirî ku pişta xwe dide çiyayan bi bawerî, hêz û hêviya ji wir digirt dengê xwe bilind dikir û her çû wek civak, gel û netewe ne tenê ji bo xwe êdî roleke ku careke din pêşengiyê ji mirovatiyê re bike girt ser milê xwe.
Lewma her ku salvegera 15’ê Tebaxê nêz dibe, di nav her beşên civaka Kurd de coş û heyecan her diçe zêde dibe. Nifşên nû ji bo fêr bibin wate û girîngiya Pêngava 15’ê Tebaxê ji yên temen mezin pirsan dikin. Û her ku fêr dibin hîn zêdetir zana û têgihiştî dibin.
Di ser Pêngava 15’ê Tebaxê re 41 sal derbas bûn. Di nav wan 40 salan de gelê Kurd bû xwedî derfetên ku civak û neteweyek bi sedê salan ancax bi dest bixe. Di aliyê zîhniyetê de gelê Kurd, di lêgerîna heqîqetê de gelek merhele derbas kirin, di afirandina pergala xwe de gavên girîng avêtin, di cîhana siyasetê de bi ya heyî qîma xwe neanî û bi siyaset û polîtîkayeke nû ya ku Rêber Apo bi felsefe, perspektîf û îdeolojiyeke nûjen afirand û wek alternatîfa tevahiya pergalên heyî dest nîşan kir; cihê xwe di nav gelên cîhanê de çêkir.
Gelê Kurdistanê, îro ji her deman zêdetir nêzî azadiyê bûye. Azadiyeke wiha ye ku li ser esasên Xweseriya Demokratîk xwe bi rê ve dibe. Li hemberî hemû zext, êrîş û lîstikên hêzên dagirker û serwer bi kamilbûneke bêhempa bûyer û diyardeyan digire dest, analîz dike û li gorî wê gavên xwe diavêje.
Êdî ti hêz heya gelê Kurd neke hesabê, ne li Kurdistan, ne li herêma Rojhilata Navîn û ne jî li cîhanê nikare ti plansazî, stratejî û taktîkan pêş bixe. Ev hêz û dînamîzma gelê Kurd û Tevgera wê ya azadiyê bê gihiştiye çi astê nîşanî her hêzê dide.
Îro gelê Kurd li her cihên ku lê dijî bi îrade û hêza xwe, xwe bi rê ve dibe û bê ka xwedî çi qudretê ye daye diyarkirin.
