Lîloz Hisên/Qamişlo
Bi dirûşmeya “Rola Jin di Pêvajoya Aştî û Civaka Demokratîk de” ji aliyê Meclisa Jin a Partiya Yekîtiya Demokratîk PYD’ê ve panêlek hat lidarxistin.
Meclisa Jin a Partiya Yekîtiya Demokratîk PYD’ê li navenda xwe ya bajarê Qamişlo panêlek bi dirûşmeya “Rola Jin di Pêvajoya Aştî û Civaka Demokratîk de” li dar xist.
Di panêlê de tevahî tevger, meclis, saziyên jinan û jinên partiyan ji hemû pêkhateyên Kurd, Ereb û Suriyan beşdar bûn.
Di panelê de du mijar hatin nîqaşkirin ya yekemîn li ser astengiyên ku jin rastî wê tên ji hêla Sema Begdaş hate dayîn, mijara duyemîn li ser çareserî çi ne ji pirsgirêkên heyî re ji hêla Sûreya Mustefa hate dayîn.
Di destpêka panêlê de bixêrhatina mêvanan hate kirin,Piştre panel destpêkir.
Sema Begdaş di destpêka mijara xwe de balkişand li ser pêvajoya Rêber Apo û tekez kir ku ev pêvajo ji tevahî gelan re ye di nav de jin, ciwan, dozên aborî û ekolojîk û wiha berdewam kir: “Şoreşa Rojava li Sûriyê û hemû cîhanê belav bû ku di nava xwe de rastî û qebûlkirina aliyên cuda dihewand.”
Sema Begdaş eşkere kir ji bo jinûveavakirina Rojhilata Navîn çar proje hene, lê ya herî serkeftî ya Rêber Apo ye û wiha got: “Ji bo Rojhilata Navîn çar proje hene yek jê projeya Sine ya Îranê ye ku hedefa wê Hîlala Şîa avabike, ya din jî bi navê Sine ku bi rêveberiya Erdogan û Colanî be, projeya 3’yemîn ew e ku Rojhilata Navîn a Mezin ji hêla Israîl bê avakirin, armanca van projeya parçekirina dewletên mezin e ku wan bikin dewletên biçûk. Lê projeya Aştî û Civaka Demokratîk ya ku ji aliyê Rêber Apo ve hatiye destpêkirin ew ê bibe çareserî ji bo Rojhilata Navîn û ew ê ya serkeftî be, mînaka wê jî niha xwe li Bakur û Rojhilatê Sûriyê nîşan dide.”
Sema Begdaş di dawî de rol û astengiyên jinan nirxand û wiha got: “Me jinan bi şoreşê re karîbû rêxistinbûyîna xwe ava bikin, bi vê jî me gelek destkeftî bidest xistin. Lê li hember vê yekê jî astengî û zehmetî derdikevin, yek jê rengê desthilatdarê ye, ji bo wê gerek jin xwe dûrî vî rengî bixin, li kêlek wê sîstema navendî jî yek pirsgirêkên jinan e ew pir xetere, lewma pêwistiya me bi şoreşa zihniyetê heye ku weke rêveberên jin çi dikeve li ser milê me em bikin, da ku ev pêvajo bi awayekî serkeftî bê pêkanîn.”
Di heman demê de Sûreya Mustefa diyar kir ku divê jin bi rêya modela neteweya demokratîk û sîstema komînal çareseriyên berfireh ji bo pirsgirêkên civakî bibînin, ji ber ku ew hêza rêveberiya saziyên demokratîkin û wiha berdewam kir: “Îro ji her demê zêdetir em hewcene ku refên xwe di nav yekîtî û hevpeymanên jinan de bikin yek. Avakirina civakeke komînal li ser bingehek edalet û wekheviya zayendî hewce dike, di çarçoveya hişmendiya gerdûnî ya zêdebûyî ya girîngiya rola jinan di pêvajoyên avakirina aştiyê de, divê jin ji hêla îdeolojîk ve werin bi hêz kirin û hemî astengiyên ku rê li ber beşdarbûna wan a bi bandor digirin werin rakirin.”
Di dawî de Sûreya Mustefa bal kişand li ser rola jinan di Sûriya nû de û wiha got: “Îro divê em ji bo parastina destkeftiyan têbikoşin, da ku Sûriyeke demokratîk, piralî û nenavendî ava bikin. Di heman demê de rola jinan di nivîsandina destûra nû ya Sûriyê de misoger bikin. Bi vê yekê rêxistinên jinan dikarin rolek bingehîn di nivîsandina zagonên nû û pêşkêşkirina modelên alternatîf ji bo têkiliyên malbatî, civakî û siyasî de bilîzin.”
