Ronahî Sadûn/Qamişlo
Koordînasyona Zarokan a li Kantona Cizîrê kiryar û komkujiyên ku li bajarê Siwêda, bi taybet ên li ser jin û zarokan ji aliyê endamên ewlekariya giştî ya Hikumeta Veguhêz li Sûriyê pêk tên, bi daxuyaniyeke nivîskî şermezar kir.
Koordînasyona Zarokan a Kantona Cizîrê kiryar û komkujiyên ku li Sûriyê bi taybet ên li ser jin û zarokan ji aliyê endamên ewlekariya giştî ya Hikumeta Veguhêz li Sûriyê pêk tên, bi daxuyaniyeke nivîskî li pêş avahiya Neteweyên Yekbûyî ya bajarê Qamişlo şermezar kir. Daxuyanî bi zimanê erebî ji aliyê Ofîsa Jin a Desteya Fêrkirin û Perwerdekirinê Ibtîsam Osman ve hat xwendin.
Daxuyanî wiha hat destpêkirin: “Ev nêzî 15 salan mafê zarokan li Sûriyê tê binpêkirin. Heta piştî hilweşandina rêjîma Baas jî tu rêzgirtin ji hevpeymana mafê zarokan re nehatiye girtin û hemû mafê zarokan heta roja îro tê binpêkirin. Senaryoya berava Sûriyê niha li bajarê Siwêda bi kiryarên hovane yên di derheqê zarok û jinan de pêk tê, tê dûbarekirin. Çekdarên bi ser hikumeta veguhêz sivîlan di hundirê mala wan a biewle de dikujin, sedemên ku ev sivîlên bê guneh tên kuştin jî ew e ku sivîl daxwaza jiyaneke baş di welatekî de ku tê de demokrasî û jiyana hevbeş di nav tevnekê de serdest be ku hemû pêkhateyên li seranserî erdnîgariya Sûriyê dihewîn e, dikin.”
Daxuyanî wiha hat bidawîkirin: “Em weke Koordînasyona Zarokan li Kantona Cizîrê bi tundî komkujiyên ku di derheqê jin û zarokan de ji aliyê endamên ewlekariya giştî ya Hikumeta Veguhêz li Sûriyê pêk tên, şermezar dikin. Di heman demê de bêdengiya navdewletî û necezarkirina wan ji sûcdaran re jî şermezar dikin. Em ê jî têkoşîn û berxwedaniya xwe ji bo bidestxistina hemû mafê mirovan di nav de yên zarokan berdewam bikin.”
