Esma Mistefa/Qamişlo
Di bin dirûşmeya “Şitlên îro, darên sibê ne” Desteya Çand û hunerê ya Kantona Qamişlo 5’emîn Pêşbirka Nivîskarên Pêşerojê ya Zrokan li dar dixe. Endamê Komîteya Amedekar a Pêşbirkê Ebdilmecîd Xelef wiha got: “Armanca me avakirina nivîskarên pêşerojê ye”.
Bi mebesta gihandin û avakirina nivîskarên pêşerojê yên ku bibin pêşengên siberojê, xebatên girîng yên huner, wêje û nivîsandinê li Bakur û Rojhilatê Sûriyê tên lidarxistin. Ji 5 salan ve Pêşbirka Nivîskarên Pêşerojê ji aliyê Desteya Çand û Hunerê ya Kantona Cizîrê ve tê lidarxistin. Dewreya 5’emîn jî dest bi ragihandina pêşbirkê kiriye. Her wiha wê pêşbirk li ser çend qonaxan dabeş bibe û wê nêzî meh û nîvekê dirêj bike heyanê bighêje encamê. Têkildarî vê mijarê Endamê Komîteya amedekar a Pêşbirkê Abdilmecîd Xelef ji rojnameya me re axivî.
Orgenîzekirina pêşbirkê
Ebdilmecîd di destpêkê de behsa orgenîzekirina pêşbirkê kir û wiha got: “Pêşbirka nivîskarên pêşerojê ya zarokan
ev bû 5 sal in tê lidarxistin, tenê salekê nehat amedekirin ji ber belavbûna nexweşiya Koronayê. Beriya hefteyekê rêklama wê hat ragihandin da ku em zarokan pêşwazî bikin. Pêşbirk ji sê qonaxan pêk tê, destpêkê me deriyê tomarkirin û pêşwazîkirina zarokan kir, piştre wê pirtûkên çîrokan li ser zarokan bên belavkirin, ew pirtûk jî li Qamişlo tên amedekirin û li hemû bajarên kantonê wê belavbibin. Herwiha wê di qonaxa duyemîn de zarok bi devikî tiştên ku ji wan pirtûkan naskirin û têgihiştine ji komîteyê re vebêjin, da ku em asta têgihiştina wan bi riya çîrokan nas bikin û piştî deh rojan wê her yek tiştê ku ji wan berheman naskirine bi rengekî nivîskî deynin. Qonaxa sêyemîn em wan dibin cihekî geştiyariyê li wir hin çalakî tên lidarxistin û wê her yek çîrokekê ji xeyalên xwe amede bike.
Temenên ku em pêşwazî bikin ji 10 heyanî 14 û ji 15 heyanî 18’a ye, her wiha ew çîrok li gorî asta wan hatine amedekirin da ku zehmetiyan nekşînin. Di dawiyê de wê pileyên her sê qonaxan komî hev bibin û li gorî jêhatiyên wan kesên serkeftî diyar bibin. Her wiha pêşbirk bi sê zimanan tê lidarxistin wê ji her beşekê sê zarok biserbikevin”.
Wê hemû zarok werin xelatkirin
Ebdilmecîd da zanîn ku wê hemû zarok bêne xelatkirin û wiha domand: “Piştî ev her sê qonax bi dawî bûn û 9 kesên serkeftî hatin hilbijartin, wê bi şahiyekê werin xelatkirin. Lê belê wê hemû beşdarvan werin xelatkirin ne tenê kesên ku bi ser ketine. Ji ber ger îro zarokek hewildana xwendin û nivîsandinê dike, ev ji bo me serkeftina herî mezin e. Xelatên me jî wê berhemek û pirtûkxaneyek ji 10-15 pirtûkan pêk tê û qirtasî be. Di heman demê de armanca me ne xelatên madî ne, lê wê bi rengekî sembolîk miqdareke madî jî hebe”.
‘Avakirina nivîskarên pêşerojê’
Ebdilmecîd bal kişand ser armanca wan ji vê pêşbirkê û wiha axaftina xwe qedand: “Her çendî civak bi xwendin û nivîsandinê bê perwerdekirin, ewqas wê di pêşerojê de bibe xwedî rol. Dawiya xwendin û zanebûnê nîn e, ji lewra jî divê ev zarok ji niha de dest bi xwendinê bikin, mijar çi dibe bila bibe, helbet di dawiyê de wê sûd ji bo wan be. Armanca me ya sereke avakirina nivîskarên pêşerojê ye ku bi tayebt di dema betlaneya dibistanan de em vê çalakiyê çêdikin, da ku bi tiştên vala re mijûl nebin û bikaribin vê betlanê di tiştên sûdemend de bikarbînin. A herî girîng jî ku ev nifşên nû li ser bingehên rast werin perwerdekirin û bibin deng û nameya gelê xwe ji hemû cîhanê re”.
