Hemza Sêvo/ Qamişlo
Romana nivîskar Ebas Ebas ya bi navê Xewnên Şiyarî li HRRK’ê hat îmzekirin. Ebas Ebas da zanîn ku romana wî bi bergê duyem hat çapkirin û got, “Romana Xewnên Şiyarî çîroka gelê Kurd li hemû Kurdistanê vedibêje.”
Ebas Ebas nivîskarekî Kurd e, 52 sal in ku di warê roman, kurteçîrok û nivîsên şanoyî de karên nivîsandinê didomîne û dikarîbû 16 berheman biafrîne.
Herî dawî karîbû hejmara berhemên xwe bike 17 û romana xwe ya bi navê Xewnên Şiyarî ya çapa 2’emîn bi 150 rûpelî bi Kurdiya Kurmancî li Qamişlo derxîne.
Amadekirina wê
Ebas derbarê amadekirina romana xwe de wiha got: “Ji sala 1996’an ve min romana Xewnên Şiyarî nivîsiye, du çapên wê hene, çapa yekem di sala 2004’an hate çapkirin, lê min gelek guhertin tê de çêkirin, herî dawî da ku li Rojava jî ev berhem were peydakirin, min îsal ev berhem li Qamişlo çap kir.”
Çîrok romana Xewnên Şiyarî
Nivîskar Ebas Ebas têkildarî çîroka romana xwe wiha bi lêv kir: “Romana min çîroka inkarkirin, şoreş û êşa gelê
Kurd li her çar parçeyên Kurdistanê vedibêje. Çîrok li Girê Mîra yê girêdayî Nisêbînê rû dide, li ser sê xortên Kurd û xewnên wan e. Wan şevbuhêrkên xwe bi xewna gihaştina Ewropayê diqedanin, lê derfet ji bo hemûyan çênebû. Xortek jê daxwaza wî ew e ku bigihêje Ewropa, piştî demekê digihêje wir, bi jineke Elmanî re dizewice, welatê xwe ji bîr dike û tê kuştin, yê duyem kurê muxtar e, şûna bavê xwe digire û dawiyê ji ber têkiliyên cinsî tê kuştin. Xewna xortê sêyem jî ew bû ku bibe şoreşgerek di Partiya Karkerên Kurdistanê de, ew kurê dayikeke normal û hejar bû, xewna wî pêk tê û tevlî xebatê dibe û ev xebat tê domandin. Çîrokên dirjê bi sê xortan re çêdibin, lê min bi kurtasî xewnên xortan û encamên romanê anîn ser ziman.”
