Lîloz Hisên/Qamişlo
Hevserokê TEV-ÇAND’ê Xelîl Tehlo diyar kir ku îsal wê di Pêşengeha Şehîd Herekol a Pirtûkan de zêdetirî 100 çapxane beşdar bibin û wiha got: “Armanca me ku pêşengeh li ser asta cîhanî pêşbikeve û herêma me bibe cihê zansitê.”
Di 20’ê Tîrmeha 2017’an yekemîn car pêşengeha Pirtûkan a Şehîd Herekol ji bo bîranîna têkoşer û nivîskar Hisên Çawîş hat lidarxistin. Êdî Desteya Çandê ya Herêma Bakur û Rojhilatê Sûriyeyê bi koordîneya Desteya Çandê ya kantona Cizîrê TEV-ÇAND’ê salane Pêşangeha Pirtûkan a Şehîd Herekol li dar dixe. Di pêşengehê de gelek çapxaneyên xwecih û yên navneteweyî beşdar dibin.
Îsal jî pêşengeha Pirtûkan a Şehîd Herekol ya 9’emîn wê di 15’ê Cotmehê de li parka Azadî ya bajarê Qamişlo bê lidarxistin.
Derbarê amadekariyên pêşengeha Pirtûkan a Şehîd Herekol Hevserokê TEV-ÇAND’ê Xelîl Tehlo ji Rojnameya me rte axivî û wiha got: “Em hewildan û têkiliyên xwe berfireh dikin da ku îsal beşdarbûna pêşengehê ji salên derbasbûyî berfirehtir be. Îsal wê tevlîbûn ji Sûriyê, Bakur û Rohilatê Sûriyê, Başûrê Kurdistanê, Rohilatê Kurdistanê, Misir û dewletên kendava erebî be. Dê pirtûk bi zimanê Kurdî, Erebî, Kurmancî ya Soranî, Suryanî û Ermenî, Engilîzî, Elmanî, Tirkî Fransî û Rûsî be. Mijarên pirtûkan ev in: Wêje, çîrok, roman, helbest, çîrok, şano, lêkolîn, felsefe, zanistên civakî, siyaset, fikir, dîrok, ziman, rêziman, ferheng, gotarên cuda bên pêşandan.”
Xelîl Tehlo tekez kir ku Îsal ew dixwazin berhemên zarokan jî pêşbixin da ku her kes bibîne û bibe weke piştgiriyek ji wan re. Di pêşengehê de wê berhemên jinan jî bi awayekî balkêş bê pêşandan û wiha got: “Îsal wê zêdetirî 100 çapxaneyên xwecihî û navnetewî tevlî pêşengehê bibin. Herwiha Beşeke taybet ji bo pirtûkên Rêber Abdullah Ocalan wê bên pêşandan ji ber ku îsal guhertineke mezin ji bo cîhanê bi giştî ji aliyê fikir û aştiyê dide pêş.”
Di pêşangehê de, bernameyên çandî û hunerî mîna semîner û panel bên li dar xistin herwiha karên destan bên pêşandan.
Li gorî komîteya amadekar pêşangeh wê 7 rojan dewam bike.
‘Hêviya me herêma Bakur û Rojhilatê Sûriyê bibe cihê zansitê’
Hevserokê TEV-ÇAND‘ê Xelîl Tehlo derbarê giringiya li dar xistina pêşengeha Pirtûkan a Şehîd Herekol wiha anî
ziman: “Lidarxistina pêşangehê roleke mezin di xurtkirina çanda xwendinê nava civakê û teşwîqkirina nivîsandinê de dilîze. Armanca me ku ev pêşengeh li ser asta cîhanî deng vede û pêş bikeve. Em dixwazin di riya vê pêşengehê de her kes bi huner, nivîsandin û afirnadinên xwe di aliyê raman, çandî û zanistê beşdar bibe û rê li ber kesên ku dixwazin tevlî bibin vekirî ye. Em bi hêvî ne ku herêma Bakur û Rojhilatê Sûriyê bibe cihê zanist û fikir.”
Xelîl Tehlo wiha gotina xwe qedand: “Em bi hêvî ne ku di rêya rêklam û bazirganan jî weke hevkariyeke çêbibe da ku bibin piştgiriyek ji bo li dar xistina vê pêşengehê.”
