Hêvî Keleş/ Qamişlo
Bi dirûşmeya “Rengên Zaroktiyê aştiya Sûriyeyê xêz dike“, 6’emîn Festîvala Aştiya Ya Zarokan li Navenda Çand û Hunerê ya kantona Tebqayê, li ser dika Şehîd Musena Ebdulkerîm ku du rojan dewam kir, bi dawî bû.
6’emîn Festîvala Aştiya ya Zarokan , bi dirûşmeya “Rengên Zarokatiyê aştiya Sûriyeyê xêz dikin” li Navenda Çand û Hunerê ya kantona Tebqayê, li ser dika Şehîd Musena Ebdulkerîm, hate lidarxistin. Di festîvalê de 550 zarok beşdar bûne, hewiha di festîvalê de 12 komên cihereng beşdar bûne ev kom jî wê şano, stran, dîlan û helbestan pêşkêşkirin.
Festîvala Aştiya ya Zarokan di 30‘Pûşberê de dest pê kiriye û di 1‘Tîrmehê de hate bi dawî kirin, ev festîval her sal bi armanca ku aştî li Sûriyeyê pêk were, di heman demê de aştiyê bîne zarokên Sûriyeyê tê lidarxistin.
Di çalakiyê de nûnerên ji Desteya Çand û Hunerê ya Rêveberiya Xweser a Bakur û Rojhilatê Sûriyeyê û Desteya Çandê ya kantona Tebqayê, endamên meclisên rêveber û qanûnsaz, nûnerên ji partiyên siyasî û meclisên sivîl û şêniyên kantonê amade bûn.
Di roja yekem a festîvalê de gelek huner hatin pêşkêşkirin, performans hatin pêşkêşkirin. Di destpêkê de pêşandaneke hunerî ya mezin ji bo zarokan bi navê “Emaneta bav û kalan” hat pêşkêşkirin. Ew pêşandan xwedî peyamên neteweyî ye ku daxwaza biratî, jiyana hevbeş, aştî û hezkirinê di nava pêkhateyên civaka Sûriyeyê de dike.
Dûre koma Meharat (Jêhatî) dîlan û şanoyek, koma Hilm El Xed (Xewna sibe) şano, koma Gupikên Firatê stran, koma Cîhana Zarokatiyê dîlan, komên Şitlên Efrînê û Ava Mezin ên Zarokan şano û dîlan, pêşkêş kirin. Çalakî bi arîtmetîka zihnî bi dawî bû.
Herwiha di roja duyemîn a dawî ya festîvalê de hevserokatiya Meclisa Rêveber a Rêveberiya Xweseriya Demokratîk a kantona Tebqayê, Desteyên Çand û Hunerê yên Tebqa û Reqayê, şêniyên bajêr, zarok û endamên saziyên Rêveberiya Xweser, amade bûn.
Komên hunerî yên beşdarî festîvalê bûne, hunerên xwe pêşkêş kirin. Destpêkê Koma Şano ya Girstêrka Zarokatiyê şanoyek li ser berxwedana şehîd Zîlan (Zeyneb Kinacî) û têkoşîna jinan a di oxira azadiyê de pêşkêş kirin.
Di heman demê de komên beşdar berhemên şano, helbest, stran û govend pêşkêş kirin. Di dawiya festîvalê de hevseroketiya Meclisa Rêveber a kantona Tebqa, hevserokê Desteya Çand û Hunerê ya kantonê û hevseroketiya Desteya Çand û Hunerê ya Reqayê komên beşdar xelat kirin.
