Dilyar Cizîrî
Roja 5’ê Gulanê Rêveberiya Xweseriya Demokratîk a Bakur û Rojhilatê Sûriyê bi daxuyaniyekê di nava berxwedêrên Bendava Tirşrînê de serkeftina mezin ragihand. Ev serkeftin piştî berxwedana gel a nêzî çar mehan bê navber li ser bendavê û şehîdbûna kerwanekî qehremanên herêmê yên ji hemû pêkhateyan, pêk hat. Berxwedana li Bendavê di demekê de li tevahî Sûriyayê guhertinên mezin têne jiyankirin, çêbû. Di vir de gelên Bakur û Rojhilatê Sûriyayê bi hêza xwe ya leşkerî û sivîl, isbat kir heger gel xwe li ser esasê ŞERÊ GEL Ê ŞOREŞGER birêxistin bike tu hêz wê nikaribe vîna wî bişkîne. Min berê jî di nivîsa xwe ya roja 22’ê Nîsana îsal de bi sernavê ‘Bendava Tişrînê Kobana duyemîn e!’ gotarek weşand. Ez ê îro carke din dubare bibêjim ku Benava Tişrînê ji bo biratiya gelan û hêza hevgirtina gel bûye nimûneyek din a berxwedanê. Çawa li Miştenûr Arînan evsaneyên dîrokî nivîsandin û bûn ilhama tevahî cîhanê. Îro Berxwedana hevalên me yên şehîd di şexsê Bavê Teyar, Bavê Hogir, Cîhan Bilgîn û Egîd roj de em hemû şehîdên berxwedanê bi rêzdarî bibîr tînin. Bi ked û têkoşîna wan ev bû xeleka duyemîn a evsaneya Arîn Mîrkan ku li ser Girê Miştenûr hate nivîsandin. Wan Bendava Tirşrînê veguherand keleheke din a serkeftinê. Li Kobanê DAIŞ’ê bi hemû hêz û piştevaniya xwe têk çû. Li Bendava Tişrînê Dewleta Tirak û bi hezaran çeteyên wê têk çûn. Di herdû dîmenan de wêrekiya gelê Bakur û Rojhilatê Sûriyayê û fedekariya wan zindî bû. Bendava Tişrînê bi tovê berxwedana Kobanê mezin bibû. Îro bi ragihandina serkeftinê re, berhem û destkeftiyên serkeftinê radestî zarokên Sûriyayê dike. Çima ez dibêjim Sûriyayê ji ber serkeftina Berxwedana Bendava Tişrînê wê bandorê ne tenê li Bakur û Rojhilatê Sûriyayê bike. Di heman demê de wê destê dirêj ê dewleta Tirk û çeteyên biyanî yên ji gelek aliyên cîhanê ku îro di Sûriyayê de wêranî û xirakirinê dikin, qut bike. Ji lewma pêwiste em bêjin serkeftina Bendavê ya tevahî gelê Sûriyê û têkçûna pergala Osmaniyên serdemê ye. Li bendavê bersiva komkujiyên Berava Sûriyayê û kujerên bi dehezaran gelan hate dayîn. Di heman demê de riya parastina durzî û hemû pêkhateyên Sûriyê yên li dijî tundrewyê ye. Çawa serkeftina li Kobanê bû zemîna bingeha têkbirina çeteyên DAIŞ’ê, ji îro ve em dikarin bêjin serkeftina Bendava şehîdan wê bibe zemîna têkçûna pergala tundrew û şidetê. Ji vir ve wê pêlên guhertina di Sûriyayê de destpê bike. Bawer im encamên wê jî wê di çend mehên pêş de zelal diyar bibe. Min got çend meh, dibe wiha dirêj neke jî. Wiha diyare ev serkeftin wê bibe zemîna hevgirtina gelên azadîxwaz ên ji bo avakirina Sûriyaya demokratîk amadene. Li ser vî esasî ji me û tevahî gelê Bakur û Rojhilatê Sûriyayê tê xwestin ku li ser esasê hevgirtina gelan ji bo Sûriyaya demokratîk têkoşîna xwe li ser asta Sûriyê û derve mezin bikin. Heger em wateya serkeftina Bandava Tişrînê bi pêkhateyên din ên Sûriyayê re nedin naskirin, wê bar girantir bibe.
