Ayşa Silêman/Dêrik
Jina bi navê Xunav Ehmed ku xwediya firoşgeha şêraniyê ye diyar kir ku bi saya Şoreşa Rojava jinê karî gelek gavên serkeftî bavêje û wiha got: “Şoreşê bandor li min kir da ku ez û xwişkên xwe firoşgeheke şîraniyê vekin.”
Piştî şoreşa 19’ê Tîrmehê gelek jin û ciwanan hewil dan bi rêya vekirina pirojeyên taybet yên biçûk aboriya xwe pêşbixin û xeyalên xwe pêk bînin. Yek ji jinên ku ji bo pêşxistina aboriyê firoşgeheke şêraniyê di sala 2018’an de li bajarê Dêrikê vekir, jina Kobanî Xunav Ehmed e ku bi 4 xuşkên xwe re ev firoşgeh vikir û niha nêzî 7 karmendan tê de kar dikin.
Di derbarê vekirin, kar û xebatên firoşgeha şêraniya ya bi navê Yasmîn, xwdiya firoşgehê Xunav Ehmed ji Rojnameya me re axivî.
Şêraniya Yasmîn
Jin Kobanî Xunav Ehmed di destpêka axaftina xwe de wiha got: “Destpêkê em li Şamê bûn ,li wir nêzî 8 salan min
di cihê şêraniyê de kar kir û ez fêrî çêkirina şêraniyê bûm. Dema em hatin bajrê Dêrikê ez û sê xwîşkên xwe û bi alîkariya birayê min jî me nîqaş kir û em pirojeyeke bi vî rengî vekin. Ev yek ji bo me cihê serbilindahiyê bû ku me karî em vê pirojeya xwe pêk bînin. Di avakirina vî cihî de bavê me destek da me da ku em gavek wisa bavêjin. Di destpêka vekirinê de kar gelek baş derbas dibû, lê niha dolar gelek bandor li kar kir, ev yek hêlişt ku çûn û hatin kêm bibe. Raste niha buhayê dolar daketiye lê hîn em her tiştî bi buhayekî giran dikrin. Astengiya ku rastî me tê di milê kêmbûna kare û buhayê kelûpelan de ye.”
‘Eger xwesteka mirov hebe astengî ji holê radibin’
Xunav Ehmed bang li tevahî jinan kir ku bi îradeyeke xurt xewin û xeyalên xwe pêk bînin û axaftina xwe wiha qedand: “Hêviya min ew e ku rewşa Sûrî ber bi başiyê vê here û kar vegere weke berê. Di heman demê de her jineke ku xwedî xewn be, bila xewnên xwe pêk bîne ji ber ku dema xwesteka mirov hebe tu astengî nikarin pêşiya mirov bigre.”
