Hêvî Keleş/ Qamişlo
Welatiyên bajarê Qamişlo anîn ziman ku ew bi hêviya çareserkirina pirsgirêk û doza kurdî ne û wiha gotin: “Pêwîsta mafê kurdan bê parastin û kurd bi hev re bibin yek, bi yekîtiya gelê kurd teqez wê mafê me bê bidestxistin û Rêber Apo jî fîzîkî azad bibe.”
Bi armanca pejirandina dîtineke yekgirtî ya kurdî, konferansa yekrêzî û yekhelwesta kurdî li Rojavayê Kurdistanê bi tevlîbûna zêdetirî 400 kesan ji Rojava, Bakur û Bakurê kurdistanê pêk hat. Erka yekemîn a konferansê, ew bû ku pergala Xweseriya Demokratîk a Bakûr û Rojhilatê Sûriyeyê ku bi keda şehîdan û şoreşa Rojavayê Kurdistanê re hatiye avakirin û li Rojhilata Navîn bûye hêviya demokrasiyê biparêz e, herwiha ji bo avakirina yekîtî û yekrêziya kurdên Rojavayê Kurdistanê kar û xebateke bêhempa tê meşandin.
Derbarê Konferansa Yekrêzî û Yekhelwesta kurdî li Rojavayê Kurdistanê, welatiyên bajarê Qamişlo ji rojnameya me Ronahî re nerînên xwe anîn ziman.
‘Konferans bi saya fedakariyên şehîdan û berxwedana gelê kurd pêk hat’
Welatiya bi navê Rifaa Xelo anî ziman ku ji demeke dirêj ve gelê kurd li hêviya vê konfiransê bû û wiha got: “Em
hêvî dikin ku gelê kurd ji bo mafê xwe têkoşînê bike û di destûrê de, mafên kurdan were mîsogerkirin û gelê kurd tevahî mafên xwe yên rewa bi dest bixe. Ez konferansa yekrêziya kurdî pîroz dikim û bi hêvî me xewna me pêk bê û em yekitiya kurdan pêk bînin, ku zilma li ser gelê kurd bi dawî bibe. Ev konferans bi saya fedakariya şehîdan û berxwedana gelê kurd pêk hat. Em hêvî dikin ku ev konferans bibe bingehek ku di pêşerojê de hemû partiyên kurdan di kongreyeke netewî de bên cem hev.”
‘Konferans gaveke girîng ber bi yekîtiya kurdan a li Sûriyê ye’
Welatiyê bi navê Sebrî Hiso kefxweşiya xwe anî ziman û wiha got: “Ev yekîtî diyarî têkoşîn û berxwedaniya
şehîdan e. Ev konferansa yekrêzî û helwesta kurdî hat lidarxistin ji bo çareseriyeke dadmend ji bo pirsgirêka kurdî li Sûriyê wekî dewleteke demokratîk û nenavendî nîşan bide, herwiha wek gaveke girîng ber bi yekîtiya kurdan a li Sûriyê ve hate nirxandin. Ev konferans bi saya fedakariyên şehîdan û têkoşîna rêber Abdullah Ocalan pêk hat. Bi yekîtiya gelê kurd em ê azadıya fîzîkî ya Rêber Apo jî pêk bînın.”
