Lîloz Hisên/Qamişlo
Rêveberiya Odeya destwerdana Lezgîn a Heyva Sor A Kurd Ferhan Silêman da zanîn ku bi armanca xwegihandina şêniyan di rewşên awarte de xalên beşa lezgîn li ser rêyan hatin avakirin.
Ji bo alîkariya şêniyan her ku diçe Heyva Sor a Kurd li herêma Bakur û Rojhilatê Sûriyê projeyên xwe berfireh dike, da ku karibe xwe bighîne hemû kesên ku hewcdarî piştgirî û alîkariyê ne. Di dema dawî de Heyva Sor a Kurd xalên rewşên awarte li ser rêyan di navbera bajaran de ava kirin, tê de hemû pêwistiyên rewşên awarte hene, çi rewşên awarte derkeve ev xal karin xwe bighînin şêniyan bi awayekî lezgîn.
Derbarê mijarê Rêveberiya Odeya Destwerdana lezgîn a Heyva Sor A Kurd Ferhan Silêman ji rojnameya me re axivî.
Ferhan Elî Silêman diyar kir ku di konferansa dawî de ya Heyva Sor a Kurd de biryar hate dayîn ku beşê xwe yên lezgîn zêde bikin û wiha domand: “Da ku zêdetir em karibin li ser rewşên awarte û kampan bisekinin, heta niha me gelek navendên awarte ava kirin e, bajarên ku pêwîstî hebû em navendên xwe lê vekin weke Til koçer, Çilaxa û Dêra Zor, navend hatin vekirin.”
Cihên ku xalên awarte hatin avakirin ev in:
Di navbera Qamişlo û Hesekê gelek qeza çêdibû, beşa lezgîn hate avakirin li ser rêya çerxerêya Hitînê.
Ji ber dûrêjbûna rê di navbera Reqa û Hesekê, ji bo rewşên qeza an rewşên giran ku li wan deveran derdikevin bi awayekî lez destwerdanê bêkirin.
Di navbera Qamişlo û Til koçer jî beşa lezgîn hate ava kirin.
Armanca avakririna xalên lezgîn
Bi armanca destwerdaeke lezgîn bê pêşkêşkirin herwiha da ku alîkarî bê kirin ji gelek gundên hawîrdorê navend û xal li ser rêyan hate avakirin.
Liv û tevgera xalên beşa deswerdana lezgîn
Beşa Lezgîn di seranserî 24 seatan di tevgerê de ne, her navendek an xalek ambolansek heye, her ambolansek sê ajokar û sê paramdîk hene, tîma rewşên awarte her dem amade ne û hemû perwerdekirî ne.
Têkilî
Ferhan Elî Silêman wiha got: “Odeya Emeliyata û Beşa Lezgîn heye hemû navendên me girêdayî vê odê ne, 24 seatan vekirî ye ji bo rewşên awarte, gel li kîjan bajar be karin li hejmaran bigerin, ev ode têkilî bi navendan re dikin li gorî cihê ku ew lê dimînin, destwerdanê dikin ji rewşên awarte.”
Hêjayî gotinê ku hemû xizmeta ku Heyva Sor pêşkêş dike bê dirav e û jmara telîfonê wiha ye: 0932125933 – 0935288541 – 0996877447
