Dilovan kêfo/Amûdê
Xwarin beşeke bingehîn a Filiklora çandî ya her civakekê ye, adet û kevneşopiyên gelan nîşan dide. Komeke jinên bajarê Amûdê ji bo pêşxistina aboriya xwe xwarinên gelerî amade dikin.
Li bajarê Amûdê komek jin bi rêya çêkirina xwarinê debara xwe dikin û çanda xwarinê gelerî diparêzin. Derbarê mijarê de du jinên ku endama koma jinênê ku xwarinên gelerî amade dikin ji rojnameya me re axivî.
Jina bi navê Nûra Hesen di destpêka axaftina xwe de wiha got: “Em weke komek ji jinên bajarê Amûdê, ji bo pêşxistina aboriya xwe me dest bi karê amadekirina xwarinên gelerî kir. Em xwarinên bi taybet bi herêma xwe amade dikin. Em dixwazin xwarinên xwe yên gelerî bi tevahiya herêmê û cîhanê bidin nasîn.”
Nûra Hesen da zanîn ku koma wan ji 5 jinan pêk tê, her jinek bi erkekî radibe û wiha domand: “Koma me ji 5 jinan pêk tê, jinek di warê medya civakî de de kar dike, ya din jî pêşwazkirina daxwazên kesên ku xwarinê dixwazin dike û sê jinên din jî xwarinê amede dikin. Em hewil didin ku kesên xwarina me dibin, kefxweş û razî bin. Zehmetiyên ku derdikevin pêşberî me, derfetên me yên kêm û biçûkbûna cihê ku em xwarinê lê amade dikin.”
Nûra Hesen axaftina xwe wiha qedand: “Ya herî girîng ew e ku em çawa karibin hevsengiyê bixin navbera karê xwe û mala xwe de. Ji ber vê yekê em êvarî hemû karên xwe dikin û piştî wê jî em karên xwe yên hevbeş jî dikin. Hêviya min ew e ku karê me mezin bibe û piştgirî ji bo me bê pêşkêşkirin. Banga min ji bo her jinekê, pêwîst e jinkar bike û her tim di asta pêşengtiyê de cihê xwe bigre.
Jina bi navê Cîhan Hesen jî behsa çêkirina xwarinê kir û wiha got: “Ji demeke dirêj ve min dixwest dest bi pirojeya amadekirina xwarinên gelerî bikim. Ji ber ku ez pir ji vî karî hez dikim. Piştî min derfet dît, min bi hevalên xwe re ev piroje dest pê kir. Em hemû xwarinên gelerî mîna serûpê, şamborek, Kutilk û hwd çêdikin. Ez bi hêvî me ku karê me berfirehtir bibe û her jinek ku ji vî karî hez dike tevlî me bibe.”
