Ayşa Silêman/ Dêrik
Endamê Kordînasyona Çapxaneya Şehîd Herekol Ehmed Şêxmûs diyar kir ku avakirina Çapxaneya şehîd Herekol gaveke herî pîroz bû, ji ber ku ew yekem çapxaneye li ser asta Rojava ku pirtûkan çap dike.
Ji bo 1’emîn salvegera şehadeta Şehîd Hisên Şawîş (Herekol) Desteya Derayî ya Kantona Cizîrê di 22 Tîrmeha sala 2017’an de bi navê Herekol li Dêrikê çapxaneyek vekir.
Di derbarê kar û xebatên Çapxaneya Şehîd Herekol a bajarê Dêrikê de Endamê Kordînasyona Çapxaneya Şehîd Herekol Ehmed Şêxmûs ji Rojnameya me re axivî.
Kar û xebatên çapxaneyê
Ehmed Şêxmûs da zanîn ku vekirina çapxaneyê di herêmê de gavekî herî baş bû û wiha got:”Di çapxaneyê de gelek amûr hene û dabeşkirî ne. Kar ji cem beşê dîzaynê dest pê dike, paşê radestî beşê çapê dike, êdî beşê çapê bi karê xwe radibe. Di heman demê de piştî çapkirinê êdî beşê qutkirinê li gor teşeya ku tê xwestin qut dike û di dawiyê de beşê pêçanê bi karê pêçandina rûpelan radibe. Piştî ku karê van beşan bidawî dibe em agahiyê didin beşê komkirinê, da ku rûpelan kom bike û pirtûkan çêbike. Astengiyên herî zêde rastî me tê çaksazkirine, ji ber rewşa herêmê heya ku amûr ji me re tên gelek zehmete û bi bihayekî giran e. Di heman demê de em astengiyan di milê fêrkirina kakeran de dibîninn, ji ber ku hin kes hene em demeke dirêj bi wan re mijûl dibin û di dawiyê de jî fêr nabin. Di destpêka ku çapxene hatî vekirin xwesteka fêrkirinê bêtir hebû ji dema niha. Ji ber dema çapxane hatî vekirin heya kesên 14 salî jî cihê xwe têde girtin, lê bidemê re dema guhertin çêbû me hin pîvan guhertin, pêwîst e xort herin leşkerî û ji nû ve cihê xwe di çapxaneyê de bigrin. Ji ber ku ev yek dihêle dispilîn bêtir çêbibe.” Endamê Kordînasyona Çapxaneya Şehîd Herekol Ehmed Şêxmûs axaftinên xwe bidawî kir û wiha got:” Hêviya me ew e ku em hertim bikaribin vî karê pîroz berdewam bikin ji ber ku ev kar yek ji destkeftiyên Şoreşê ye. Di heman demê de astengiya çaksazkirina amûran jî çareser bibe.”
