Ronaz Silêman/Qamişlo
Mala Êzîdiyan a Kantona Cizîrê cejna Çarşema Serê Nîsanê “Sersala Êzîdiyan” li gundê Dugirê yê bajarê Amûdê pîroz kirin.
Îro li gundê Dugirê yê bajarê Amûdê Sersala Serê Nîsanê “Çarşema Sor” bi beşdariya civaka Êzîdî, Sazî û Meclisên Rêveberiya Xweser, Hêzên Leşkerî, Partiyên Siyasî, Saziyên Civaka Sivîl, kesayetên Serbixwe, Tevger û Rêxistinên Jinan hate pîrozkirin.
Beriya ku şahiya pîrozbahiya Sersala Serê Nîsanê were destpêkirin hemû beşdarvan xuleyeke bêdengî li ser giyanên şehîdan rawestiyan.
Piştre ji aliyê Koma Şehîd Farûq çend têkistên olî hatin gotin. Yekîtiya Êzîdiyên Sûriyê û hevserokê Mala Êzîdiyan a Kantona Cizîrê Îsamîl Delef û Koordînasyona Yekîtiya Êzîdiyên Sûriyê Meryem Cindo cejna Çarşema Serê Nîsanê pîroz kirin û wiha gotin “Dema em behsa çarşema serê Nîsanê dikin, xweza bala me dikşîne ji ber bi bîr û bawerî di felsefa Êzîdatiyê de her tiştê Êzîdatiyê bi xwezayê ve girêdayî û bi taybet ev cejin. Dema xweda gerdûn afirand li gorî baweriyê roja Çarşemê temam kir, dema cara yekem xweda ruh bi insan xist, xwîn xiste laşê mirov de, ji ber vê yekê civaka Êzîdî zêdetirî civakên din giringî dide roja Çarşemê. Herwiha çima meha Nîsaê bi taybet ji ber xweda di vê mehê de her tiştî jî nû ve zindî dike. Cejna îsal jî bi hîn bêtir bi coş û kelecane ji ber ku nameyeke giranbuha ji aliyê Rêber Apo ji bo civaka Êzîdî hat û ev name taybetmendiyeke wê ya cûda hebû.”
Hevserokê Meclisa Cîbcîkar a Rêveberiya Xweser a Kantona Cizîrê Hesen Şero axivî û wiha got: “Sersala kurdên Êzîdî li tevahî gelên Bakur û Rojhilatê Sûriyê, bi taybet li gelê me yê Êzîdî yê berxwedêr, xwedî dîrok û çanda berxwedanê, herwiha li tevahî hêzên me yên parastinê û hêza milîtanên Şingalê pîroz be. Ev hêz ji bo parastina
civaka Êzîdî bûn mertal li pêşiya siyasta tunekirin û qirkirinê. Hêzên dagirker ên li ser xaka Kurdistanê her tim xwestine cejnên me yên netewî û olî ji naveroka wê dûr bixin. Lê bi israra gelê me yê girêdana bi xaka xwe ve, bi taybet gelê me yê Êzîdî, siyaseta dagirkeran têk çû. Îro li ser axa Sûriyê, bi taybet li Bakur û Rojhilatê Sûriyê siyaseta demokratîk û biratiya gelan pêk hatiye.” Şahiya Sersala Serê Nîsanê bi xwendina nameya Rêber Apo ya ku ji gelê Êzîdî re şandibû dewam kir.
Piştre Şêx Murşid El-Xeznewî axivî û wiha got: “Çarşema Sor li tevahî civaka Êzîdî û gelê kurd û Kurdistanê pîroz be. Tevî ku malbata me oldarê ola islamê bûn, lê nayê bîra min ku me Çarşema Sor pîroz nekiribe. Çarşema Sor ne tenê destpêka sala nû ye, li cem gelê me yê Êzîdî, lê sembolekê dide diyarkirin ku çiqas hewldan hatine kirin ku civaka Êzîdî ji holê bê rakirin, lê îro pîrozkirina we ji Çarşema Sor re bersive ku tu carî tav nayê veşartin.”
Koma şehîd Laliş a govendê, Koma Dibistana şano, Koma şehîd Zeredeşt Şingalî ya Stranan, herwiha helbestvan pêşeroja cewherî, koma şehîdên Êzîdîxan a govendê, koma Tolhildan a Stranan, hunermend Siyan Nebo, Zendîn, Mihemed Welîd û Îbo Can beşdarî şahiyê bûn û bi sitran, helbest û govendên xwe coşa beşdaran bilind kirin.
