Ahmet Aktaş
Rêber Apo, di Newroza 1973’yan de rastiya gelê xwe nas kir û da ser şopa vê rastiyê, vê heqîqetê û heta îro bê navber meşiya û dimeşe.
Bi qasî tiliyê destekî dest bi vê meşê kir, îro hijmara vê meşê, şopdarên vê rêya rastiyê, gihiştiye milyonan û her roj ev jimar, zêdetir dibe.
Vê şopdariya rastiyê, li gel pêkanîna yekîtiya netewî, bandora xwe derbasî asta navneteweyî jî kiri ye.
Piştî biryar û banga 27ê Sibata 2025’an a bi navê Banga Aştî û Civaka Demokratîk, hema di nava hefteyekê de, him ji aliyê Tevgêra Azadiyê, him ji aliyê gelê Kurdistanê û him ji aliyê dostên navneteweyî/enternasyanolî yên gelê Kurdistanê ve, bi lezgînî hat pejirandin û hat pêşewazî kirin.
Berê jî di rojên nasyar ên meha Adarê de, bi hejmara kêm-zêde, bi asayî dihatin bîranîn û pêşewazî kirin. Lê îsal, bi vê Bangê re, hat dîtin ku ew rojên diyar 8’ê Adarê, 21 Adarê û hwd. hema di serê mehê de van rojan hat pêşewazî kirin û hema meha Adarê bi tevayî bû weke rojên pîrozbahiyê.
Her wiha ev pîrozbahiyên bi coş û xuroş, ne tinê li çar parçeyên Kurdistanê, belê hema li hemû cîhanê û ji her salan berfirehtir hat peşewazî kirin û pîroz kirin.
Li aliyê din, mijarek ji salên berê cudatir û watedartir ev e ku, van çalakiyên pîrozbahiyê, bênavber li pey hev dewam kir û hin jî didomin.
Vaye di meha Nîsanê de, bi pêşewazîkirina 4ê Nîsana rojbûna Rêber Apo, heman çalakiyên pîrozbahiyê, bi naveroka heman xwediderketina biryar û banga Rêber Apo ve, mîna Referandomê dewam dike.
Wisa tê xuya kirin ku, wê li pey şopa Rêber Apo ya li ser rêya heqîqetê, şopdarên felsefe û rastiya wî jî, wê bênavber bi zêdebûn dewam bikin û bi pêşve bibin. Ev meşa germ û dilsoz a bi hevrebûna cewherî ya li ser şopdariya heqiqeta mirovahiyê û xwezayiyê, dibe nîşaneya ku êdî hemû rojên salê, wê bênavber, bibin rohnayî û germaya jiyana mirovahiyê ya xweş û geş.
Erê di her du-sê rojên despêkê de, wateya Banga Rêber Apo baş nehat zanîn.
Bê gûman di vê tênegihiştina gel de, bandora propaganda reş û bêexlaqî ya sazî û kesên neyar jî pir bû. Hilbet ev mijar, ji bo her kesên şopdar û hezkirên Rêber Apo, cihê xwerexnekirinê ye.
Lê belê di demek kurt de, ev xemsarî hat sererastkirin û bi saya şîroveyên rast ên Tevgêra Azadiyê, rewşenbîrên niştimanperwer û hinek dost û hezkirên bi rûmet ên Rêber Apo û gelê Kurdistanê, bandora wê bangeşî û propaganda xerab hat şikandin û gelê Kurdistanê, bi hemû hêza xwe ya tî û birçîbûna azadbûnê, da ser şopa rêya Rêberê xwe û bi lez meşiya û dimeşe!
Jixwe gelê me yê Rojava, weke ku li ber çava ye, jiber lezeta jiyana azad tam kiriye, lewma mîna ku li Bendava Tişrînê pir zelal tê dîtin, ku çawa bi dil û can li Banga Rêberê xwe xwedî derdikeve û bêtirs berxwedanê dimeşîne!
Ev serkeftin li we pîroz be!
