Dîlan Mulhim\ Qamişlo
Rêveberê Kombenda Efrîn a Civakî Ibrahîm Heftaro diyar kir ew ji bo vegera koçberên Efrînê li ser mal û milkên xwe di nava liv û tevgerê de ne û wiha got:”Divê ew kesên ku di Efrînê de niştecih bûne derkevin û gelê herêmê vegere li ser cih û warê xwe.”
Piştî ketina Rêjîma Baas û hatina rêveberiya HTŞ`ê li ser desthilatdariya Şamê ya nû, li herêmên dagirkirî bi taybet li Efrîn, Girê Spî û Serêkaniyê hîn jî dagirkerî berdewam e û welatî nikarin vegerin li ser cih û warê xwe. Herwiha di vê dema dawî de li ser vegera koçberan gelek nîqaş tên kirin.
Di derbarê rewşa Efrînê û vegera koçberan Rêveberê Kombenda Efrîn a Civakî Ibeahîm Heftaro ji Rojnameya me re axivî.
Ibeahîm Heftaro di destpêka axaftina xwe dde wiha got: “Piştî hatina HTŞli ser desthilatdariya Şamê gelek
guhertin di Sûriyê de pêk hatin û vê yekê bandor li tevahiya gelên Sûriyê kir. Piştî hilweşandina Baas, dewleta Tirk a dagiker sûd ji vê yekê girt û êrişên xwe yên li ser herêma Bakur û Rojhilatê Sûriyê zêdetir kirin. Herwiha êrişî Şehbayê û Til Rifetê jî kir, di encamê de gelek kes şehîd bûn û şêniyên wan cihan koçberî herêmê bi ewle yên Rêveberiya Xweser bûn. Herwiha careka din Efrîn bû qurbaniya diyaloga di navbera Erdogan û Ebû Mihemed Alcolanî de û li herêmên dagirkirî komkujî berdewam in. Herwiha serdana Ebû Ehmed Cewlanî ji bajarê Efrînê re bê encam bû û piştî wê serdanê bi sedan welatî hatin girtin.”
‘Pêwîst e gelê Efrînê vegere li ser cih û warê xwe’
Ibeahîm Heftaro wiha domand: “Piştî têkçûna Rêjîma Baas û hatine desthilatdariya Şamê ya nû, pêwîste ew kesên ji Şam, Dara`a, Himis û Helebê ên ku li Efrînê bi cih bûne derkevin û vegerin cih û warên xwe. Em jî weke Kombenda Efrîn ketine nav liv û tevgerê da ku her kes vegere ser mal û milkên xwe. Di vê drbarê de me meşek li pêşiya Rêxistina UN li darxist, ev meş ji bo ku ew kesên di Efrînê de niştecihbûne derkevin, herwiha gelê Efrînê vegere li ser mal û milkê xwe. Li ser vê bingehî me gelek civîn çêkirin. Yek ji wan civînan bi hevseroka Desteya Têkiliyên Derva a Rêveberiya Xweser a Bakur û Rojhilatê Sûriyê Elham Ehmed re çêkir, nîqaşên ku di civînê de hatin kirin, mijare vegera koçberan bû. Elham Ehmed ji me re diyar kir ku di civînên wan yên li dserve çîdibin xala sereke vegera gelê Efrînê li ser mal û milkên xwe ye. Rêveberiya xweser jî tekez kir ew ji bo vegera koçberên Efrîn danûstendinan dikin.”
Rêveberê Kombenda Efrîn a Civakî Ibeahîm Heftaro axaftina xwe wiha bi dawî kir: “Em ji hêzên navneteweyî daxwaz dikin ku rê li ber dagirkeriyê bigrin û bibin alîkar da ku gel Efrînê vegere li ser axa xwe jiyan bike. Herwiha banga min ji gelên herêmê re ew e ku her kes bi hev re jiyan bike û destek bidin hev.”
