Lîloz Hisên/Qamişlo
Hevserokê Nivîsgeha Têkiliyên Giştî ya PYD`ê Sîhanok Dîbo tekez kir ku beşdarên di foruma “Asoyên çareseriya Sûriyeyê û kêşeyên wê” bi rengekî eşkere û zelal anîn ziman ku hêviyên wan ku şêwazê Rêveberiya Xweser bibe şêweyekê ji bo giştî Sûriya pêşerojê.“
Partiya Yekîtiya Demokratîk PYD`ê di 13`ê Sibatê de forumek bi navê “Asoyên çareseriya Sûriyeyê û kêşeyên wê”, li hola El Erd El Seîda ya li bajarê Reqayê, bi beşdariya siyasetmedarên Sûriyeyî, rewşenbîr, oldar û endamên saziyên sivîl û MSD’ê, rewşenbîrên ji Siwêda, Şam, Hema, Himus, herêmên berava Sûriyeyê, her wiha nûnerên Rêveberiya Xweseriya Demokratîk, li dar xist.
Derbarê mijar, nêrîn û encamnameya ku di forumê de hatin nîqşkirin û dayîn, Hevserokê Nivîsgeha Têkîliyên Giştî ya PYD`ê Sîhanok Dîbo ji rojnameya me re destnîşan kir ku Partiya Yekîtiya Demokratîk her sal di çarçoveya vê forumê de hemû hêz, kesayet, partî, tevgerên niştîmanperwer û demokrat ên Sûriyê vedixwîne.
Sîhanok Dîbo diyar kir ku nêzî 80`ê kesayet, tevger, hêz, partiyên siyasî û kesayetên serbixwe di foruma çaremîn de hazir bûn.
Sîhanok Dîbo wiha anî ziman: “Di forumê de du mijarên sereke hatin nîqaşkirin (Rewşa Sûriyeyê piştî ketina
rejîma Baas, nirx û hêmanên komara sêyemîn a Sûriyeyê) û (çareserkirina pirsgirêka Kurd li Sûriyeyê, Netewa Demokratîk, ji bo avakirina Sûriyeke demokratîk nimûneya Rêveberiya Xweser).”
Sîhanok Dîbo wiha pê de çû: “Di forumê de bi dehan mudaxele ji hemû aliyan ve hatin kirin, nîqaş, nêrîn û pêşniyarên beşdaran ên taybet û bilind li ser mijara guhertin û veghurîna Sûriyê, goftûgoyên pir girîng çêbûn. Piştgirî ji bo mijara nenavendiya Sûriyeyê, Rêveberiya Xweser û rola QSD û çareseriya doza Kurd hate kirin. Nîşqaşên berpirs ne tenê di çarçoveya nêrînan de bûn, lê beşdaran hêviyên xwe bi rengekî eşkere û zelal anîn ziman ku hêviyên wan ew e şêwazê Rêveberiya Xweser bibe şêweyek ji bo giştî Sûriyeya pêşerojê.”
Sîhanok Dîbo îşaret kir ku Sûriyê pir rengî ye, ji gelek pêkhateyên cuda, ol û baweriyan pêk tê, lewma jî çareserî û taybetmendiya van pêkhateyan di riya şêwazê Rêveberiya Xweser de tê parastin, wiha berdewam kir: “Beşdaran tekez kirin ku Rêveberiya Xweser beşeke girîng ji bo çareseriya doza Kurdî û doza Sûriyê giştî ye, ji bo pêkanîna wê jî misogeriya xurtkirina Rêveberiya Xweser û piştgiriya rola QSD pêwîst dike.”
Di dawiyê de Hevserokê Nivîsgeha Têkîliyên Giştî ya PYD`ê Sîhanok Dîbo encamname û biryarên ku di forumê de derketine anîn ziman:
Encam û biryarên forumê bi daxuyaniykê di dawiyê de li gorî nerînên beşdaran anîn ziman û bi boneya komploya navdewletî li ser rêber Abdullah Ocalan ev in:
-Redkirina şêwazê komploya navdewletî ya li ser Rêber Abdullah Ocalan û daxwaza azadiya fîzîkî ji bo Rêber APO.
-Piştgiriya çareseriya doza Kurd li gorî qanûnên navdewletî.
-Çareseriya doza Sûriyê û astengiyên heyî di riya diyalogê de û rêgirtina li pêşiya destwerdanên derve bi taybet dagirkeriya Tirk.
-Vegera bi ewle ya koçberan bi taybet Efrîn, Serêkaniyê û Girê Spî.
