Ayşa Silêman/ Qamişlo
Berdevka Ofîsa Jin a Meclisa Malbatên Şehîdan a Kantona Cizîrê Hêvî Seyîd diyar kir ku şehîd nirxên herî pîroz in lewma dagirkerî dest tavêje van nirxan û ev yek sûcekî nemirovî û nexlaqî ye.
Dagirkeriya Tirk bi hemû awayan êrişî gelê kurd dike û dixwaze pirojeya Netewa Demokratîk têk bibe. Di van demên dawî de êdî berê xwe dide goristanên Şehîdan û oxirên pîroz, ev yek tê wateyê ku dagirkeriya Tirk heya ji şehîdên gelê Kurd jî ditirse.
Di derbarê kiryarên dagirkeriya Tirk yê di derheqê goristanên Şehîdan de, berdevka Ofîsa Jin a Meclisa Malbatên Şehîdan a Kantona Cizîrê Hêvî Seyîd ji rojameya me re axivî.
Hêvî Seyîd da zanîn dagirkeriya Tirk ne tenê binesaziyê û mirovan dike armanc, heta goristanên Şehîdan jî ji kiryarên
dagirkeriyê yên hovan e bêpar namînin û wiha got: “Dijmin ku herdem dixwaze me qir bike, helbet ew ê tevahiya kiryarên hovane jî pêk bîne. Dema dagirkerî berê xwe dide goristanên me tê diyarkirin ku hisaba ji şehîdên me jî dike. Ev tê wateyê ku dijmin di ber têkçûnê ve diçe, lewma hemû şêwazên êrişan bikar tîne. Lê bila dagirkerî baş zanibe, em ê li hember vê yekê bisekinin û hertim li ser piyan bin û wê nikaribe moralê me bi van kiryaran bişkîne. Ev kiryar û êrişên ku dagirkerî dike ne li gor qanûnên navdewletî ne jî. pêwîste hêzên navnetewî bêdeng nemînin. Divê herkes helwesta xwe nîşan bide. Eger ku hêzên navnetewî bêdengin ev tê wateya ku ew çavê xwe jê digrin. Lê dagirkeriya Tirk dizane ku çiqasî gel bi şehîdên xwe ve girêdayî ye û nirxên wan diparêze, lewma berê xwe dide goristanên wan û dixwaze moralê gel bişkîne.”
Berdevka Ofîsa Jin a Meclisa Malbatên Şehîdan a Kantona Cizîrê Hêvî Seyîd axaftinên xwe bidawî kir û wiha got: “Li hemberî kiryarên dagirkeriyê yên hov wê çalakiyên me dewam bikin. Em ê her tim ji bo şehîdan têkoşînê bikin û bejna xwe li ber wan bitewînin û hertim em ê ji bo wan soza xwe nû bikin. Me bi axaftina berxwedan jiyan e dest pê kiriye û em ê her û her li ber xwe bidin. Wê serkeftin ya me be. Em ê li benda axaftina mîmarê azadiyê Rêber Apo bin û em qet ranawestin. Hêviya me ew e ku Rêber Apo fîzîkî azad bibe û ev keda ku 47 salan em dikin wê bi ser bikeve û em ê bighêjin mafên xwe.”
