Ahmet Aktaş
Dema ku min bala xwe da berxwedêrên vê dawiyê û bi taybetî yên Tişrînê; ruh, hilwest, coş û naveroka gotinên şervan û bi taybetî yên gel, pir bala min kişand
Hema yekser gotin û hilwestên Rêber APO yên hinek demên ku çarenûsa gel di rojevê de bû, hatin bîra min. Yek jê dema Şehadeta Hakî Karer bû; di 1977an de em li Enqereyê ji semînerek KURTULUŞ’ê derketin û meşiyan.
Rêber APO bi xemgînî belê bi dûrbîniyek kûr, van gotinên dîrokî rêz kir: Bi şehadeta Heqî re, peyama dewletê ev e; me bitirsîne û em dev ji şoreşgeriyê berdin, îca du rê li pêş me ne; devjêberdana şoreşê yan jî bi tolhildana şehîdê xwe, mezinkirina şoreşê! Helbet li ser rêya duduyan meşiya û rêxistina xwe mezintir kir; û di 1978an de Partiya Karkerên Kurdistanê (PKK) ava kir.
Ya duyem jî çalakî û şehadeta Mazlûm Dogan bû; di Newroza 1982’an de em li Rojhilata Navîn bûn. Rêber APO li ser vê çalakiyê jî bi xemgîniya xwe re, bi bingehîn biryardariya xwe ya ji pola nîşan da û got: Peyama hevalê Mezlûm, ji bo me ferman e, jixwe bi vê çalakiya xwe êdî ne bi tenê tirs şikand, belê êdî mirin jî li ber çavê me biçûk kir û divê êdî bi amadekariyek gelek mezintir em, vegera welat pêk bînin, encex wisa tola hevalên zîndanê hilînin û em karibin layiqî wan bin! Tê zanîn, çalakiyên zindana Amedê li pey hev dewam kirin; çalakiya Ferhat Kurtay û hevalên xwe, çalakiya nexwarinê heta mirinê ya Xeyrî, Kemal, Akîf û Alî!
Li ser ruh û peyamên van çalakiyan Rêbar APO, hemû hevalên xwe yên derketibûn Rojhilata Navîn-Lubnan, li ser wê biryardariya xwe perwerde kirin û bi ruhekî berxwedêr, serhildêr û tolhildêr vegerand welat-Kurdistanê!
Kurteçîroka dîroka vê berxwedana dîrokî ya bi dirûşma berxwedan jıyan e dest pê kir û îro gihiştiye Tişrînê, mirov dikare wisa nîşan bide: Li ser fermana wan pêşengên zîndanê, Rêbar APO perwerda hevalên xwe temam kir û bi rêxistinên nûjen re derbasî welat kir. Bi navê rêxistinên siyasî û leşkerî; ERNK, HRK, ARGK û hwd pêşî bi Komên Çekdarên Propagenda pêngavên mîna 15’ê Tebaxê hat avêtin û paşê pêvajoya şoreşa gelîrî ya demdirêj dest pê kir, dewama wê gihişt Şoreşa Rojava ku ev bû 12 sal in dewam dike!
Îca ew ruh û helwestên şoreşgerî, yên yek bi yek di wan qonaxên dîrokî re derbas bûn ku îroj gihiştine Tişrînê, di kesayetên Bavê Teyar, Menice Heyder û hevalên wan de, helwesta bi giştî ya şervan û gelên herêmê yên Rojhilat û Bakurê Sûriyê, ew gotinên Rêber APO yên şikandina tirsê û biçûkirina mirinê yên di wan qonaxên dîrokî de hatibûn gotin, anîn bîra min.
Lewma mirov dikare bêje di şoreşa me de ev qonaxeke nû nîşan dide, ji ber ku êdî li kêleka şervanan piraniya gel jî, tirs şikandiye û dikare bi wêrekî berê xwe bide mirinê. Ev şoreşa xwedî pêşeng û gelekî wisa serhildêr û berxwedêr e ku ti caran naşike, belê neyarên wan dişkin û pergala wan hildiweşe.
