Şengalî çalakiya xwe ya li dijî girtina korîdora mirovî ya di navbera Şengalê û Rojavayê Kurdistanê de berdewam dikin. Serokeşîrên Ereban ji bo piştgiriyê serdana çalakiya nobetê kirin.
Di 15’ê Kanûna 2018’an de korîdora mirovî ya di navbera Rojava û Şengalê de ji aliyê rayedarên Iraqê ve hatibû girtin. Li ser israra gelê Şengalê û çalakiya nobetê ya li ber derî rayedarên Iraqê bi awayeke fiîlî derî vekiribûn û soz dabûn gel ku vekirî bimîne. Lê rayedarên Iraqê soza ku dabûn gel pêkenanîn û careke din korîdor li ser gelê Şengalê de girt.
Ji bo ku careke din korîdora mirovî ya navbera Şengalê û Rojava were vekirin roja pêncşemê gel li ber derî li hev kom bûn, konê nobetê vedan û helwesta hikûmeta Iraqê şermezar kirin. Bi seden kes beşdarî çalakiyê bûn. Çalakî berdewam dike. Herwiha duh gelek serokeşîrên Ereb ên li Şengal û derdora wê ji bo piştgiriyê serdana çalakiyê kirin.
Şengaliyan eşkere kir ku heta ku derî neyê vekirin wê çalakiya xwe berdewam dikin…ROJNEWS
