Idrîs HENAN
Kengî û çawa du pirsên bingehîn di jiyana mirovan de ne. Yek hêvî û azweriyan rave dike û yek jî rêbaz û çawaniya pêkanînê destnîşan dike. Dema ku zindiyek rêbaza jiyana rast a xwe dispêre hêmanên azadî, wekhevî û komonalbûyînê ji dest dabe, wê çaxê tekez bê hêvîtiyekê dijî. Ango bi pîvanên derdorê yên ku sîstemên serdest afirandine re marjînelîze bûye, bê hîle û bê altirnatîf maye. Di bersivên herdu pirsan de, ango di hilbijartina bersiva pirsa yekemîn de asta vîn, israr û enerjiya bicihanînê diyar dibe. Gelê me beriya damezirandina Tevgera Azadiya Kurdistanê û lidarketina Şoreşa Rojava, Bakur û Rojhilatê Sûriyê her di nava lêgerîna bersiva Kengî de bindest mabûn. Hêza xwe ya jiyanê ji dest dabûn. Ne dikarî berpirsiyartiya pisîkekê jî hilde ser milê xwe! Ev jî asta koletiya ku li ser hatibû ferzkirin ji aliyê rejîma serdest ve diyar dike.
Gelê li beramberî hemû cureyên înkar û tunekirinê li gorî xwezaya xwe ya mirovî tev digeriya, ango hewldanên wî yên afirandina rêbazên têkoşîna serkeftî her di nav qalibên bermahiyên jidestdanê de kilîtkirî mabûn. Tevî fedekariya mezin ya gelê me ku mînakên wê di dîroka Rojhilata Navîn de kêm in, lê ji ber şidandina asta îzolê û hovîtiya neyaran her di nava hewldanên xwe de dihate perçiqandin. Îro jî hêzên hegemon ên nûnerên serdestiya modern ên global dikin, hewl didin serketina gelan di şexsê Rojava, Bakur û Rojhilatê Sûriyê de piştî nêzî heşt salan têk bibin û ji nû ve li gorî qubleta hêza navendî, dewrûberê dîzayin bikin. Mirov dikare tevgerbûna hêzan vê dawiyê li ser axa Sûriyê û biryara serokê Amerîka Trump di vê çarçoveyê de jî binirxîne.
Berovajî hemû pêşbînî û analîzên ku bi salane serê vê civakê werimandine, carek din isbat bû ku hêza Şoreşa Rojava, Bakur û Rojhilatê Sûriyê hêza bersiva guncaw a çareseriyê ye. Enerjiya teqyayî ya daneheva berxwedana dîrokî ya gelan e. Her wiha di hunavên xwe de cewherê çawaniya jiyana azad a ku xwe dispêre nirxên gelan ên azadî, edalet, wekhevî û demokrasiyê dihewîne. Ji ber vê taqeta xwe ya herikbar êdî veguheriya hêza têkneçûyî ya gelên Bakur û Rojhilatê Sûriyê. Ji vê jî zêdetir; bi îradeya xwe ya berxwedanê li ser esasê xweparastina rewa, ji hemû gelên cîhanê re bûye hêvî û çirûska ku riya azadiya gelan ronî dike ye. Ji rojên destpêkê ve îradeya gelên Bakur û Rojhilatê Sûriyê azad bû, îro jî bi hinek biryarên ku dixwazin vê îradeyê kedî bikin û ji xwe re bikin mal, ti firsenda wan a jiyanê nîne. Tam berovajî vê yekê wê hemû siyasetên aliyên ku hewl didin li gorî hişmendiya xwe ya zordest nexşeyên rê diyar bikin û mîna gayan gelan di xetên cot de bajon, têk biçin.
Gelên ku bi salane şopên narvîna xwe bi xwîna zarokên xwe li ser vê xakê dineqişînin, ne gengaz e li hemberî van siyasetên desthiladariya navendî gav paş ve bavêjin. Jixwe bi hilbijartina bersiva rast a pirsa “Em ê çawa jiyana rast biafirînin” re vê têkoşînê dest pê kiriye. Dema ku têkoşînê jî dest pê kir, baş dihat zanîn ka wê rêbaza berxwedanê çawa be. Tevgera ku soza xwe bi xwîna şehêdan mihur kiriye, tevgera serkeftinê ye. Ji bilî çawaniya serkeftinê li kengtiyên qeder û li ber deriyan nasekine. Bi xwe rêbaz û şêwazên xwe yên azadiyê diafirîne.
