Bi sed hezaran welatiyên Efrînê ji ber êrîşên dagirkeriya dewleta Tirk û çeteyên wê ji Efrînê derektin û li gundên vala û kampan yên li Şehbayê bi cih bûn. Şer ber şertên nebaş û zehmetiyên jiyanî nexweşiya laşmanî pêş ket. Ji ber vê yekê Heyva Sor a Kurd li herêma Şehbayê dest bi pêngava dermankirina nexweşiya laşmanî kiriye.
Heyva Sor a Kurd li herêmên Şehbayê dest bi hemleya dermankirina nexweşiya laşmanya kir ku di nava welatiyên Efrînê de belav bûye.
Ji ber şerê çend salan gund û bajarokên herêmên Şehbayê vala bûbûn. Piştî ku welatiyên Efrînê ji ber êrîşên artêşa Tirk a dagirker û çeteyên wê neçar man ku ji malên xwe derkevin û li Şehbayê bi cih bûn, gelek nexweşî ji ber bermahiyên şer û xirabûna li wê derê di nava wan de pêşketin. Ji wan nexweşiyan ya herî berbelav jî laşmanya ye.
Di vê çarçoveyê de Heyva Sor a Kurd dest bi pêngava dermankirina kesên ku bi vê nexweşiyê ketine, kir. Bernameya Heyva Sor a dermankirinê wê hefteyekê li navendên girêdayî Heyva Sor ên li herêmên Şehbayê dewam bike.
Endama Heyva Sor a Kurd Hêvîn Henan diyar kir gelek welatiyên Efrînê ji ber bermahiyên şer ên çend salan li herêmê bi nexweşiya laşmanya ketine.
Hêvîn diyar kir ku ew wek Heyva Sor erka wan e ku dermanan ji kesên nexweş re peyda bikin û da zanîn ku ji ber herêm di bin ambargoyê de ye derman hinekî dereng ji derveyî herêmê peyda kirin. Hêvîn destnîşan kir ku piştî wan derman peyda kirin û wan dest bi dermankirina kesên nexweş li tevahî herêmên Şehbayê kir. Hêvîn diyar kir ku wan 4 nuqteyên tenduristiyê ji bo dermankirina kesên nexweş ji gund û kampên herêmê re diyar kirine.
Nuqteyên dermankirinê li Kampa Berxwedan, Kampa Serdem, navçeya Ehres û navçeya Til Rifet in. Kesên nexweş dikarin di hefteyê de du caran serdana nuqteyên dermankirinê bikin. Nuqteyên dermankirinê rojane vekirîne…ANHA