Xebatên xwe parastinê li Rojava dewam dikin. Di vê çarçoveyê de li bajaroka Til Xezalê ya başûrê Kobanê navendeke Hêzên Parastina Civakî HPC’ê bi merasîmekê hat vekirin. Bi dehan welatiyên bajarok û endamên Rêveberiya Xweser a Kobanê tevlî merasîma vekirinê bûn. Di merasîma vekirina navendê de li ser girîngiya parastinê û HPC’ê axaftin hatin kirin.
Di çarçoveya parastina rewa de, welatiyên Bakurê Sûriyê roj bi roj hêza xwe ya civakî ya bi navê HPC`ê xurtir dikin. Li ser vê bingehê, HPC`ê navendeke xwe li bajaroka Til Xezal ê başûrê Kobanê vekir.
Navenda HPC`ê bi navê Şehîd Sebrî bi merasîmekê hate vekirin. Bi dehan welatiyên bajarok û şandeyek ji Rêveberiya Xweser a Kobanê tevlî merasîma vekirinê bûn.
Hevserokê Şaredariya Kobanê Faris Etî di merasîmê de axivî û diyar kir ku ev navend bersiva êrîşên li ser Kobanê ye û cihê parastinê ye û got: “Vekirina navendeke bi vî rengî xwedî derketina li nirxên şehîdan e, em bi parastina xwe bersiva her êrîşan didin.”
Endamê Rêveberiya Meclisa bajaroka Til Xezal Cemal Elî bi xêr hatina mêvanan kir û got: “Armanca me ji vekirina navendê ku her kes xwedî li parastina warê xwe derkevê û axa xwe biparêzin.”
Piştî axaftinan, deriyê navendê ji aliyê dayîka şehîd Sebrî, Helîm Şêxo ve hat vekirin…ANHA