Elîzabeth Gewriye diyar kir ku AKP dewama Îttîhat Terakkî ye û got, “Dixwaze komkujiyên nû bike û Bakurê Sûriyê dagir bike.”
Alîkara Hevserokên Meclîsa Rêveber a Rêveberiya Xweseriya Demokratîk a Bakur û Rojhilatê Sûriyê Elîzabeth Eysa Gewriye ji ANF’ê re axivî û got, “Me rêveberiyên xweser ên demokratîk ava kir ku mafên olî, etnîkî û rêveberiyê yên hemû gel û civakan nas dikin. Dema ku me destpêka sala 2014’an rêveberiyên xweser ên demokratîk ava kir, me wekhevî, biratiya gelan û edaleta civakî ji xwe re esas girt.”
Elîzabeth Eysa Gewriye anî ziman, bi saya şervanên ku Bakurê Sûriyê bi dayina berdêlên giran û bi têkoşîneke mezin ji êrîş û fikrên tarî diparêzin, ew niha li ser piyan e û got, “Bi saya têkoşîna mezin, me karîbû Rêveberiya Xweseriya Demokratîk a Bakur û Rojhilatê Sûriyê ava bikin. Ev rêveberî ne ji bo parçekirina Sûriyê, ji bo avakirina Sûriyeke nû û demokratîk ava bû. Ji bo gelên Bakurê Sûriyê xwedî îrade bin û di destûra bingehîn a nû ya Sûriyê de ev îrade were naskirin û temsîlkirin ava bû.”
Gewriye diyar kir, projeya wan a demokratîk, dewleta Tirk a ku mejiyê wê ne demokratîk e aciz dike û wiha dewam kir: “AKP dewama Îttîhat û Terakkî ye. Çawa ku Îttîhat û Terakkî rabû Suryanî û Ermenî qetil kir, AKP jî dixwaze Seyfoya mîna sala 1915’an pêk bîne. Li aliyê Efrîn, Bab û Cerablûsê komkujî kir û gel ji cih û warê wan kir. Dixwaze demografiya van herêman biguherîne. Erdogan dixwaze bi rêya şerekî mezin ê herêmî Ereban, Kurdan, Suryaniyan, Tirkmenan, Ermeniyan, Çerkezan qir bike û ji Bakurê Sûriyê derxîne.”
Gewriye işaret bi projeya rêveberiya xweser a demokratîk kir û anî ziman, ev projeya wan xwedî wê hêzê ye ku dikare terora li herêmê biqedîne. Gewriye wiha dewam kir: “Hêzên me heta niha li keleha dawî ya DAÎŞ’ê şer dikirin. Tevî vê yekê jî Erdogan êrîşê dibe ser projeya me, dibe ser hêzên me. Êrîşî Serêkaniyê, Kobanê û Girê Spî dike. Dixwaze mejiyê xwe yê yekperest û şoven li ser axa me jî nîşan bide. Bi vî rengî bêhnê tîne ber terora DAÎŞ’ê û destekê dide DAÎŞ’ê.”
WELAT Û GELÊ ME HÊJAYÎ ÇARESERIYÊ YE
Elîzabath Gewriye di dawiya axaftina xwe de anî ziman kur, ji bo şerê li gelemperiya Sûriyê biqede û êdî krîz çareser bibe divê Neteweyên Yekbûyî dest li rewşê werde û wiha got: “Gelên Sûriyê bi têra xwe êş kişandin. Em dixwazin Sûriyeke demokratîk ava bikin. Ji ber ku welatê me, axa me û gelên me hêjayî vê yekê ne.”
