Ikbal BEDRAN
Di bin diruşma “Pêşeroja Sûriyê di nav nesazîbûna cemseran û hevrikiya partiyan de” Yekîtiya Rewşenbîrên Efrînê roja 26 vê mehê li Kampa Serdem semînerek li dar xist. Di semînerê de sê xalên ( Rola çalakiyên civakî, rola saziyên rewşenbîrî û rewşenbîran, danûstandina bi rejîmê re û Kurd û aloziyê yekbûnê) hatin nîqaşkirin.
Endamê dîwana semînerê Hevserokê Yekîtiya Rewşenbîrên Efrînê Usama Ehmed derbarê rola çalakiya civakî de ev tişt got: “Niha li Bakur û Rojhilatê Sûriyê hişmendiya ku civakê esas digire li pêş e.”
Ehmed derbarê rola rewşenbîriyê diyar kir ku di rastiya rewşenbîr de pêşengtî heye.
Di dirêjahiya semînerê de rewşa li Efrînê rûdaye bû mijareke encamgirtinê. Ji bo vê babetê Ehmed got: “Bi dagirkirina Efrînê re eşkere bû ku parçebûna siyasî civak jî parçe kiriye. Di bin tesîra wê de qismek mîna ENKS destê xwe xiste destê dagirkeran û bi çete û tirkan re Efrîn dagir kirin. Qismek din jiyana di bin siya dagirkeran de pê xweş kirin û ew kişandin Efrînê. Lê bi demê re ew bangeşeya ji dagirkeran re li stûyê wan geriya. Qismê mezin ê gel jî li Şehbayê cihê xwe di mewziyên berxwedanê de girtiye.”
Girêdayî vê mijarê girîngiya yekîtiya neteweyî weke xaleke sereke derket pêş. Di vê derbarê de Ehmed got: “Mebest ji yekîtiyê, yekbûna belgeya siyasî, nerîn û projeyên neteweyî ye. Hemû hewldanên yekîtiyê têk çûne. Parçebûna siyasî bûye sersebebê parçebûna civakê.”
Hevserokê Yekîtiya Rewşenbîrên Efrînê Usama Ehmed derbarê nerîn û nîqaşên di semînerê de pêş ketine de got: “Nîqaşên semînerê bi giranî analîz bûn. Weke encam derket; hemû kêşe dikarin di avakirina civaka azad de bên çareserkirin.”
Ehmed wiha dewamkir: “Eger partiyên siyasî karîbana li Efrînê raya giştî avakiribana û li dora têkoşîna doza Kurd komkiribana, wê civak di aliyê helwest de parçe nebûya. Ehmed tekez kir ku êdî pêwîste mijarên han bi wêrekî bên nîqaşkirin. Ne rêveberî û ne jî partiyên siyasî xwe jê bidin alî. Lazime bi riya van semîneran em van qisûrên xwe derbas bikin.”
Hevserokê Yekîtiya Rewşenbîrên Efrînê Usama Ehmed di dawiyê de tekez kir ku; Şoreşa Rojava hawûza hemû aliyan e. Ji ber berzbûna nirxên xwe, ji bo yekîtiya neteweyî xwedî insiyatîf e. Di rastiya xwe ya çareserker, guherîner û veguherîner de hemû cudatî û kêşeyan hembêz dike.
