Ji bo 5 şervanan merasîmeke xiyabî hate lidarxistin

Ji bo 5 şervanên QSD`ê ku 12‘ê Cotmehê li Dêrezorê şehîd bibûn, merasîmeke xiyabî hate lidarxistin.
Meclîsa Malbatên Şehîdan a bajarê Serêkaniyê ji bo şervaên QSD‘ê Bediran EL- Selim(Ebdullah),Eyûb EL-Selim(Dilşêr),Seqir Birahîm(Zêbeq), Xidir EL- Keleş(Nemir), Hesem Mehûd(Ciwan) yên ku 12‘ê Cotmehê li Dêrazorê de şehîd bûbûn, merasîmek xiyabî lidar xist.
Merasîm li Salona Şehîdan a Serêkaniyê hate lidarxistin. Welatiyên bajêr berê xwe dane cihê merasîmê û ji malbatên 5 şervanên QSD`ê sersaxî xwestin. Salona şehîdan bi wêneyên her 5 şehîdan hate xemilandin.
Di merasîmê de li ser navê Meclîsa Malbatên Şehîdan Beyar Emîn axivî sersaxî ji malbatên têkoşeran re xwest û got: “Bi saya keda şehîdan aramî li herêmê pêk hatiye û bi saya wan em ê serkeftinên hin mezintir bidest bixin.”
Bi navê Partiya Yekitiya Demokratîk (PYD) Birahîm Selim axivî û got: “Xeta berxwedanê ku îro tê meşandin, bingeha xwe xwîna şehîdan e. Berxwedanî li Serêkaniyê dest pê kir û li Efrînê û Dêrazorê tecîdar dibe. Berxwedana li Bakurê Sûriyê tê kirin, tevahî cîhan matmayî kir. Li Efrînê berxwedana bêhempa didome, bingeha vê berxwedanê jî keda şehîdan e.”
Li ser navê Fermandariya QSD`ê Azad Welat axivî û soza şopandina rêya şehîdan û parastina destkeftiyên şoreşê da û diyar kir ji bo jiyaneke azad û birûmet berdêlên giran hatin dayîn û pêwîst e ev berdêl werin parastin û xwedî li nirxên şehîdan were derketin…ANHA