Rotînda YETKÎNER
Huner û siyaset her çiqasî, ji hev pir cuda nebin jî, di gelek waran de ji hev gelek dûr in. Divê em nezikatî û dûriya siyaset û hunerê tim di bîra xwe da zîndî bihêlin.
Çawa ku di siyasetê de kesên tenê ji bo berjewendiyên xwe ên kesayetê hene û ev kesana wek şovmenên şow dikin tim li pêşin, mixabin di hunerê de jî ev kesan gelek in.
Çawa ku di siyasetê de, kesên li gor hêzên serdest û desthilatan tevdigerin hene û her dayîm hevalbendên zorê ne, di hunerê de jî ev kesana gelek in û qirêjiyê pirranî ev kesana dixin nava hunerê.
Çawa ku di siyasetê de kesên mîllîtan hene û her dem li kêleka rastiyê, hevalbendên kedkaran û bo gelên bindest û kedkar kar dikin; di hunerê de jî gelek hunermend bi vî rengî hunerê dihûnin hene.
Yanî dixwazim bêjim em nikarin siyaset û hunerê ji hev biqetînin an ji hev zêde cuda bibînin. Lê em nikarin huner û siyasetê jî bikin wek hev. Raste divê taybetmediyên hunermed û siyasetmedar ne wek hev bin, lê ji hev gelek jî dur nîn in. Cûdahiya herî mezin a hunermend û siyasetmedar, divê hunermend mejî û hestên xwe, berê her tiştî ji bo rastiya hunerê bi kar bîne. Dûre li gor prensîbên siyaset a ku baweriya xwe pê aniye naveroka berhemên xwe tijî bike.
Siyasetmedar dikare derewan bike û ne li gor fikrê ku sedî sed raste tevbigere, lê hunermend nikare tiştek wisa bike, ger bike wê demê arabesk a qirêj wî-wê dorpêç dike.
Siyasetmedar dikare ji bo menfaetê siyaseta rojane, gelek pirensîbên xwe veşêre û heta demek ne li gor wan prensîbên xwe tevbigere; lê hunermend nikare ve yekê pêkbîne, ger pêkbîne ew dem berhemên dihûne ne huner e, sloganên hundir vala ye.
Siyasetmedar dikare, li gel siyasetek ku tenê di çend xalan de dikarin bi hevre bimeşin de, hevgirtinek demî pêk bîne. Le ger hunermend tiştek wisa pêk bîne, êdî ji berhemên ew pêktîne, bêhna hunerê dertê û ew ne huner e.
Siyasetmedar dikare raste rast derewan bike ji bo berjewediyên giştî polîtîkayên bawerî pê tîne û ev kiryar di dem kurt de qezence ji bo siyasetê. Lê ger hunermend ji bo demekê derewanb bike û li gor vê derewê hunerê bihûne, ev ne hunere, ev huner kujiye.
Kurt û cewher, siyaset û huner di warê prensîban de ji hev gelek cudane, lê hunermend û siyasetmedar na. Yanî kesên ku ideoloji an jî siyasetekê bipejirîne, dikare di wê warî de hunera xwe li gor piresîbên hunerê bihûne. Ger hunermend ji bîr neke ku huner her dayîm û bê sînor ji bo xweşikbûn, gerdûn, xweza û mirovahiyê karek bêhempaye, wê demê ew ê ji prinsîbên hunerê tawîz nede. Ger hunermendek ku ji xwe re dibêje hunermend, huner ne fêmkiribe, wê bê şik bikeve xizmeta hêstên erzan û populîst.