Berdevkê Encûmena Navendî yê YNK’ê Letîf Nêrweyî diyar kir ku divê tecrîda girankirî ya li ser Ocalan were rakirin, ji ber ku tecrîd aloziyê zêdetir dike. Nêrweyî da zanîn ku peyamên Ocalan xizmeta aştiyê dikin û tenê Ocalan dikare pirsigirêkên heyî çareser bike.
Tecrîda girankirî ya li ser Rêberê Gelê Kurd Abdullah Ocalan berdewam dike û dewleta Tirk her carê bi hincetên cuda rênade malbat û parêzerên Ocalan hevdîtinê pêkbînin. Berdevkê Encûmena Navendî yê YNK’ê Letîf Nêrweyî derbarê tecrîda girankirî ya li ser Ocalan de axivî û diyar kir ku tecrîdkirina Ocalan, rênedayîna hevdîtinên bi malbat û parêzerên xwe re xizmeta pêvajoya aştiyê nake û wiha got; “Ji ber ku bi salane Ocalan banga aştiyê dike û xwedî projeyên aştî û çareseriya pirsgirêka Kurde. Ji ber vê çendê tecridkirina Ocalan her wiha girtina parlamenter û siyasetmedaran yên li Tirkiyê, Tirkiyê dixe nava aloziyan û dibe sedem ku rewşek ne aram li Tirkiyê rû bide. Ji ber vê çendê guhdayina peyam û projeyên Ocalan xizmeta aştî û bihevre jiyankirina gelan dike. Tenê projeyên Ocalan yên aştiyê dikarin dawî li şer û kuştinan bîne.”
Letîf Nêrweyî destnîşan kir ku mifteya çareseriya pirsgirêka Kurd li Îmraliyê ye, li gel Ocalan e û wiha dawî li axaftina xwe anî: “Hemû kesên ku baweriya wan bi jiyana hevpar , aşitî û careserkirina pirsgirêkan bi diyalogê heye, divê ji bo azad kirina Ocalan xwedî helwestbin. Divê rexistinên mafê mirovan û civaka navnetewî jî, ji bo rakirina tecrida li ser Ocalan, bikevin nava tevgerê û nerazîbûnên xwe bînin ziman.”…ROJNEWS
