Berdevkê Fermî yê Meclîsa Leşkerî ya Minbicê Şervan Derwîş, diyar kir ku şehîd Ednan Ebû Emced fermandarekî leşkerî yê pêşeng bû û erka fermandariyê pêk dianî.
Di 29’ê Tebaxa 2017’an de Fermandarê Giştî yê Meclîsa Leşkerî ya Minbicê Ednan Ebû Emced di Pêngava Rizgarkirina Reqayê de şehîd bû.
Bi boneya yekemîn salvegera şehadeta Ednan Ebû Emced, berdevkê fermî yê Meclîsa Leşkerî ya Minbicê Şervan Derwîş Fermandarê Giştî ya Meclîsa Leşkerî Ednan Ebû Emced bi bîr anî û diyar kir ku şehîd Ebû Emced ji destpêka şoreşa Rojava ve beşdarî nava xebatên parastinê bibû û bi lehengî beşdarî berxwedanên rizgarkirina Kobanê û Minbicê bû. Derwêş wiha got: “Şehîd Ebû Emced fermandarekî leşkerî xwedî helwest bû û mafê fermandariyê dida.”
Derwîş diyar kir ku şehîd Ebû Emced li her derê û di hemû çalakiyan de bi rola xwe radibû, ji berê ve xwedî taybetmendiyên fermandarî bû, mohra xwe li gelek çalakiyên berxwedana Kobanê da û yek ji fermandarên ku beşdarî pêngavên rizgarkirina Girê Spî, Eyn Îsa, El-Hol, Şedadê û Bendava Tişrînê û rizgarkirina bajarê Minbicê bû.
Derwîş diyar kir ku hemû şervanên di bin sîwana Meclîsa Leşkerî ya Minbicê de tevdigerin ji destpêka çalakiya rizgarkirina bajarê Minbicê ve xwestin şehîd Ebû Emced fermandariya wan bike û wiha dewam kir: “Barê şehîd Ebû Emced di rêveberî û peywirên danûstandinan de girantir bû. Ebû Emced beşdarî civîna baregeha Încîrlîk a li Tirkiyê bû û danûstandin bi aliyên navnetewî re kirin da ku dest bi hemleya rizgarkirina Minbicê bike.”
Dêrwiş wiha dewam kir, “Bi destpêkirina Pêngava Rizgarkirina Minbicê re şehîd Ebû Emced û şehîd Ebû Leyla cihê xwe di eniyên pêş ên berxwedanê de girtin û bi lehengî şerê çeteyên DAIŞ’ê kirin. Şehîd Ebû Emced ne tenê cihê xwe di eniyên pêş ên Berxwedana rizgarkirina Minbicê de digirt, lê belê bi coş beşdarî nava xebatên rizgarkirina bajarê Reqayê jî bû. Şehîd Ebû Emced her tim li ser şervanên xwe digeriya û moralên şervanan bilind dikir. Şehîd Ebû Emced di 29’ê Tebaxa 2017’an de di çarçoveya hemleya Xezeba Firatê de şehîd bû.”
Şervan Derwîş derbarê taybetmendiyên şehîd Ebû Emced de anî ziman ku ew di rêvebirina şer û pevçûnan de hişk bû, di jiyana xwe ya leşkerî û sivîl de xwedî helwest bû û ti carî derveyî qanûnan derneket û got: “Şehîd Ebû Emced ji aliyê hemû şervanan ve dihat hezkirin”.
Berdevkê Fermî yê Meclîsa Leşkerî ya Minbicê Şervan Derwîş di dawiya axaftina xwe de anî ziman ku ew ê li ser rêya şehîdan têkoşîna xwe ya azadiyê û demokrasiyê berdewam bikin…ANHA
