Bi sedan şêniyên kantona Kobanê sersaxî ji bo malbatên 3 şervanên YPG`ê û Hêzên Parastina Gel (HPG) ku li cih û demên cuda şehîd bûne, xwest.
Şêniyên Kobanê, endam û rêveberên saziyên sivîl û leşkerî ji malbatên şehîd Îsmaîl Beşar (Mezlûm Kobanê) ku li çiyayên Kurdistanê şehîd bû, Mihemed Heso (Rustem Kobanê) û Egîd Kino (Comerd Kobanê) re ku di dema erka xwe ya leşkerî li Tebqayê de şehîd bûn, sersaxî xwest.
Konê sersaxiyê yê şehîd Mezlûm Kobanê li pêşiya Qada Azadî ya navenda bajarê Kobanê hate vedan. Yek ji rêveberên Yekitiya Ciwanên Rojava (YCR) Çiya Welat axivî û sersaxî ji malbata şehîd Mezlûm re xwest û diyar kir şehîd Mezlûm her tim digot heta yek ji parçeyên Kurdistanê dagirkirî be, heta ku dayikek ji dayikên Kurdan digirî ew wê têkoşîna xwe ji bo rizgarkirina Kurdistanê berdewam bike.
Birayê şehîd Mezlûm, Xebat Beşar destnîşan kir ku wan dixwest birayê wî xwendina xwe bidomîne lê wî rêya têkoşîn û parastina xaka welat ji xwe re hilbijart û di oxira wê de gihişt şehadetê.
Paşê kesên hazir sersaxî ji malbata şehîd Mezlûm re xwest û berê xwe da gundê Donxiz da ku sersaxiyê ji malbatên şehîd Mihemed û Egîd re bixwazin.
