Nasnameya Kerkûkê Kurdistanî ye

Endamê Civata Tevgera Goran Hêmin Şêxanî diyar kir ku divê hikûmeta Herêma Kurdistanê bersiva axaftina sefîrê Tirk a li ser Kerkûkê bide û got; “Tirkiye dixwaze bi van axaftina şikestina xwe ya navxweyî veşêre.”
Dewleta Tirk a ji aliyekê ve li Kerkûkê bi komên çete yên bi çek ku bi destê Eniya Tirkmen herêmê têk dide, li aliyê din jî niyeta xwe ya di warê Kerkûkê de hê zelaltir kir. Di 21’ê Tebaxê de sefîrê Tirkiyê yê Bexdayê Fatîh Yildiz çû Kerkûkê nimêja cejnê kir û got; “Kerkûk axa kalikên me ye, ji bo yên li vir jî Tirkiye jî axa kalikê wan e.” Ev axaftina Yildiz rastî bertekên aliyên siyasî û gelê Başûrê Kurdistanê hat.
Endamê Civata Tevgera Goran û Berpirsê Şaxê Tevgera Goran ê Hewlêrê Hêmin Şêxanî li ser mijarê helwesta Tevgera Goran aşkere kir û got; “Weke Tevgera Goran axaftina sefîrê Tirk red dikin. Li gorî me, bê cudahî Kerkûk bajarê bihevre jiyana hemû pêkhateyane.”
Şêxanî diyar kir ku Tirkiye dixwaze bi van axaftina şikestina navxweyî veşêre û wiha dewam kir; “Ji ber ku nasnameya Kerkûkê Kurdistanî ye. Dîrok şahidê vê ye. Divê birayên Tirkmen vê fêm bikin ku nasnameya Kerkûkê Kurdistanî ye.”
Endamê Civata Tevgera Goran Hêmin Şêxanî bêdengiya hikûmeta Herêma Kurdistanê ya li hemberî axaftina sefîrê Tirk Yildiz rexne kir û got; “Pêwîst bû hikûmeta Herêma Kurdistanê li şûna me bersiva sefîrê Tirk bida ya. Lê, mixabin heta niha bêdeng e. “…ROJNEWS