Şêniyên Kobanê xwestin ku bermahiyên avahiyên wêrankirî û şer li ser rêya têketina bajêr bên rakirin. Şaredariyê jî sedema vê pirsgirêkê û dema çareserikirina wê diyar kir.
Bajarê Kobanê di dawiya sala 2014’an de û destpêka 2015’an ve rastî êrîşên hovane ji aliyê DAIŞ’ê ve hat. Ji ber wê xaniyên welatiyan gelek wêran bûn. Piştî 3 salan hê jî welatî ji ber sedema bermahiyên şer zehmetiyan dikişînin.
Şêniyên taxa Kaniya Kurdan ji bo çaraserkirina pirsgirêka bermahiyan li ser rêya sereke bang li Şaredariya Gel kirin.
Welatiyê bi navê Muhyedîn Elî li rex rêyê bi cih bûye û wiha got: “Divê şaredarî bi erka xwe rabe û bajêr ji bermahiyên şer paqij bike û riyan sererast bike.” Elî destnîşan kir ku ji ber kombûna bermahiyan mêş belav dibin û ew jî dibin sedema nexweşiyan.
Welatiyê bi navê Ismaîl Reşo jî wiha got: “Hebûna van bermahiyan dîmenê bajêr xira dike û niha bûne hêlînên dûpişk û maran û jiyana şêniyan dixin metirsiyê.”
Têkildarî vê mijarê hevseroka Şaredariya Gel a Kobanê Rewşen Ebdî sedema derengmayîna xebatên paqijkirina riya Mezret Dawûd diyar kir û got: “Ji ber mijûlbûna şaredariyê bi xebatên qîrkirina rêyên bajarê Kobanê ye, ev xebat dereng maye.”
Rewşen Ebdî diyar kir ku şaredarî piştî bidawîbûna xebatên qîrkirinê, wê rêya Mezra Dawûd paqij bike…ANHA
Kobaniyan xwestin bermahiyên şer bên rakirin
