Di bin diruşmeya ” Bi felsefeya Rêber APO emê dagirkeriyê têk bibin, bi pêşengtiya jinên ciwan emê Sûriyeke azad ava bikin ” Sêyemîn Kongreya Jinên Ciwan di 8 Tebaxa îsal de li bajaroka Rimêlan ê girêdayî Kantona Cizîrê bi beşdarbûna 800 delegeyên herêmên Bakurê Sûriyê hate lidarxistin.
JIN XWEDÎ ROLA PÊŞENG E
Endama Yekîtiya Jinên Ciwan li Kantona Efrînê Newal Demircî di derbarê kongreyê de ev nirxandin ji Rojnameya Ronahî re kir. Demircî got: Delegeya Efrînê ji heft jinan pêk dihat. Di kongreyê de rapora du salan hat xwendin û xebat û têkoşîna jinên ciwan hate nirxandin. Di nîqaşên kongreyê de pirsgirêkên ku rastî jinên ciwan tên jî hatin nîqaşkirin.
Endama Yekîtiya Jinên Ciwan Newal Demircî di berdewama nirxandina xwe de got ku; di encama kongreyê de, gelek biryarên girîng hatin standin û ev tişt li axaftina xwe zêde kir: Yek ji biryarên kongreyê ew bû ku pêwîste jin ji her demê bêtir xwe birêxistin bike. Ji bo ku jin li hemberî êrişan xwe û nirxên xwe biparêze, divê di aliyê parastinê de bibe xwedî rola pêşeng. Newal dewam dike: Ji bo ku jin li hemberî zihniyeta baviksalarî ya serdest bibe bersiv, pêwîstiya wê bi perwerdehiyê heye. Ev jî yek ji girîngtirîn biryarên kongreyê bû.
BERÊ XWE BIDIN ÇEPERÊN BERXWEDANÊ
Newal Dermircî di derbarê nîqaşên li ser rola jinên ciwan di Berxwedana Serdemê de ev tişt anî ziman: Di Sêyemîn Kongreya Jinên Ciwan de rola pêşeng a jinan di 58 rojên Berxwedana Serdemê de hate nirxandin ku yek ji sembolên Berxwedana Serdemê Şehîd Avesta Xabûr bû. Endama Yekîtiya Jinên Ciwan Newal Demircî di dawiya nirxandina xwe de bang li jinên ciwan kir ku, yekser berê xwe bidin mewziyên duyemîn qonxa Berxwedana Serdemê û cihê xwe di çeperên rizgarkirina Efrînê de bigirin û got: Ji bo ku jinên ciwan bibin xwedî rêxistineke xort û têkoşîna xwe dewam bikin, pêwîste ji bo nirxên azadî û wekheviyê rola xwe ya pêşeng bi awayekî zêde rêxistinkirî dewam bikin.
Şîlan XOCE
