Piştî bidawîkirina çandina demsala havînê, cotkarên navçeya Tirbespiyê amadekariyên çandina sebzeyên payîzê dikin. Cotkaran bang li saziyên têkildar ên Rêveberiya Xweseriya Demokratîk kirin ku cureyên baş ji dermanên li dijî nexweşî û kurmikên bizirar ji wan re peyde bikin.
Di nav çend salên dawîn de, çandiniya sebzeyan li navçeya Tirbespiyê geş bûye. Şêniyên navçeyê debara jiyana xwe bi çandiniyê dikin. Her wiha Rêveberiya Xweseriya Demokratîk semad, derman û sotemenî ji cotkaran re peyde kirin.
Niha cotkarên navçeyê ji bo çandina sebzeyên payîzê wekî xiyar, bacanên reş, pîvaz, kelem û amadekariyan dikin. Girêdayî mijara pêşketina çandiniyê li navçeyê cotkarê bi navê Şahîn Mûsa diyar kir ku çandiniya sebzeyan li navçeyê roj bi roj geş dibe. Mûsa da zanîn ku niha wan pêngava xwetêrkirinê derbas kirine û di du salên borî de cotkarên navçeyê berhemên sebzeyan ên navçeyê derxistin bajar û herêmên din li Bakurê Sûriyê.
Mûsa destnîşan kir ku çandiniya sebzeya li navçeyê piştî eleqedariya cotkar û aliyên têkildar geş bûye.
Di dawiyê de Şahîn Mûsa ji saziyên pêwendîdar ên Rêveberiya Xweseriya Demokratîk xwest ku ji wan re dermanên li dijî nexweşî û kurmikên bizirar peyde bikin…ANHA
Amadekariyên çandina sebzeyên payîzê tê kirin
