Diyana Mistefa/ Reqa
5.emîn Festîvala Zarokan di roja xwe ya 2’mîn de bi çalakiyên cihreng dewam kir.
Doh, 1 îlonê Festîvala Zarokan, bi şêweyê xwe yê nû, li Kantona Reqayê dest pê kir û tê de gelek çalakî û şanoyên hunerî li Stargeha beledî a Reqayê hatin pêşkêşkirin.
Festîval îro di roja duyemîn de li bajarê Reqayê bi gelek çalakiyan ji aliyê 150 zarokan ve, li Navenda Çand û Hunerê ya bajêr didome. Di nav de govendên komên beşdar, Koma Navenda Çand û Hunerê ya Reqayê bi stranek ji mîrateya Reqayê pêşkêş kir û Koma Behar jî straneke Kurdî pêşkêş kir.
Paşê pêşangeha wêneyan ji aliyê hevserokatiya desteya çandê Lîlav Xelîl ve hate vekirin û têde 80 tabloyên hunerî ji aliyê 23 xort û keçên navenda çand û hunerê û Hîlela Zêrîn ve hatin pêşkêşkirin, piraniya tabloyan dîmenên xwezayî û jinan dihewîne.
Piştî bidawîkirina pêşangehê, zarokên beşdar serdana baxçeyê zarokan li bajarê Reqayê kirin, li wir çalakiyeke çandiniyê li dar xistin û tê de 50 dar û giyayên bîhnxweş ên wek selwan û zuwa hatin çandin.
Festîvala êvarê bi pêşandanên hunerî û karnavalek li nêzî çarxereya Saetê ya li navenda bajarê Reqayê, ji bo zarokan pêşbirka bisîkletê hat organîzekirin û li kêleka meydanê vekirina wêneyekî dîrektîf bi dawî bû. Her wiha bi koma orkestrayê konserek mûzîkê li ser dikê Navenda Çand û Hunerê ya bajarê Reqayê pêşkêş kir.
Pêncemîn Festîvala Zarokan wê di roja xwe ya sêyemîn de li gundê El-Ebara yê gundewarê bakurê kantona Reqayê berdewam dike û roja çaremîn li Kantona Tebqayê û ya pêncemîn jî li Minbicê ye were bi dawî kirin.
