Reşo Mihemed/ Qamişlo
Jinên azadîxwaz yên kantona Cizîrê, bi piştgiriya Kongra Star a bajarê Qamişlo ji bo şikandina tecrîda li ser Rêberê Gelan, Ebdullah Ocalan û azadiya wî ya fîzîkî, li barjarê Qamişlo meşiyan.
Di çarçoveya pêngava cîhanî ya bi durşmeya “Azadiya Fîzîkî Ji bo Rêber Apo, Çareserî ji Pirsgirêka Kurd re” Kongreya Star û jinên azadîxwaz yên kurd, ereb, suryan û hwd… bi durşmeya “Bi Ronahiya Rojê Re Em Ê Hev Bibînin” meşek li dar xistin.
Meş ji çerxerêya Osman Seberî ya bajarê Qamişlo bi pêşengitiya jinan dest pê kir û heta Azad Mol a li taxa Xerbî hat domandin.
Di berdewamiya meşê de wêneyên Rêberê Gelan, Abdullah Ocalan hatibû bilindkirin û jinan bi silogana “Azadî Ji Bo Rêberê Netewî, Têk Biçe Faşista Tirk, Jin Jiyan Azadî û hwd…” bang dikirin.
Girseya meşê li pêşiya Azad Mol veguherî miting, piştî wê jî meşvanan xuleyeke rêzgirtinê li ser giyanê pakrewanan rawestiyan.
Her wiha di destpêkê de li ser navê Kordînasiyona Kongra Star a bajarê Qamişlo, Şîraz Hemo diyar kir ku bi felsefaya Rêber Apo jiyana jinê û tevahiya civakê li ser asta cîhanê hate ronîkirin û wiha got: “Bi rihê Sakîne, Zîlan, Bêrîtan û tevahiya jinên azadîxwaz em li qada azadiyê soza têkoşînê bidin. Jin di roja îro de di warê siyasî, civakî, aborî û hwd… de gavên pîroz avêtin û çavê xwe vekir. Bila hêzên desthilatdar û sîstema baviksalariyê xewin nekin ku dîsa bi zincîran qeyd bikin. Ev jî bi saya fikr û felsefeya Rêber Apo ye, lewma jî bang li hêzên navdewletî, rêxistinên mafê mirovan û saziyên eleqedar dikin ku li hemberî tecrîda girankirî derkevin.”
Di berdewamiya mitingê de, bi navê Yekîtiya Jinên Ciwan jî Sara Hesen anî ser ziman ku wê têkoşîna jinan heta pêkanîna azadiya Rêber Apo bidome û wiha axivî: “ Wekî em dizanin Rêberê me îro di nav çardîwarên bêheqiya Îmraliyê de ye, lê li pişta wî li vir em weke jinên ciwan û jinên azad hene. Li ser hîmê berxwedana jinên azad li tevahiya cîhanê dadikevin qadan û hêviya jiyankirina Rêber Apo di nav xwe de diçînin. Em ê wekî jinên ku bi saya Rêberê xwe azad bûne, hertim li ber xwe bidin. Ji ber ku azadiya Rêber Apo, azadiya jinê û tevahiya civakê ye.
Mitinga girseyî bi silogana “Bijî Rêber Apo û Têk Biçe Tecrîda Girankirî” li gel tilîliyên jinan û nîşana serkeftinê dawî bû.
