Meclisa Jin a Partiya Yekîtiya Demokratîk(PYD) êrîşên dagirkeriya Tirk ku giraniyê dide kuştina jinan, bi taybetî jinên çalakvan, rojnameger û sivîlan şermezar kir û ji hêzên navneteweyî xwest ku li dijî van sûcan helwesta xwe nîşan bide.
Diyana Mistefa/Reqa
Meclisa Jinan a Partiya Yekîtiya Demokratîk (PYD) a kantona Reqayê bi daxuyaniyekê kiryarên dewleta Tirk a dagirker li dijî gelê Sûriyê û bi taybet li dijî gelê Kurd şermezar kir.
Endamên meclisên jinan yên partiyên siyasî, Partiya Biratiya Kurdistanê, Partiya Nûjen û Demokrasiyê ya Sûriyê, Partiya Demokrat a Kurdî ya Sûriyê, Partiya Kesk a Demokrat, Partiya Çep a Kurd li Sûriyê, Partiya Sûriyeya Pêşerojê, Kombûna Jinan a Zenûbiya, Meclîsa Sûriyeya Demokratîk û Meclisa Kesk a Idlibê beşdarî daxuyaniyê bûn.
Daxuyanî li ber avahiya Partiya Yekîtiya Demokratîk (PYD) ji aliyê Berdevka Meclisa Jinan a Partiya Yekîtiya Demokratîk (PYD) Fatima Xelîl ve hate xwendin û wiha hat gotin: “Ji destpêka aloziya Sûriyê ve dewleta Tirk a dagirker, hewl dide li Sûriyê xewnên xwe yên dagirkirina herêmê û osmaniya nû pêk bîne.”
Di berdewamiya daxuyaniyê de hat gotin, “Ji bo nîşandana dijmantiya xwe ya bi gelê kurd re bombebarana xwe ya bi riya balafirên keşfê dewam dike. Armanca wê têkbirina îradeya gelê me û têkoşîna wî ya demokratîk e. Bi taybet jinên çalakvan dibin armanca êrişên dagirkeriya Tirk.”
Di dawiya daxuyaniyê de wiha hat gotin: “Em bang li Meclisa Ewlekariyê ya Neteweyên Yekbûyî dikin ku ji bo pêşî li êrîş û bombebarana dewleta Tirk a li herêmên me yên Bakur-Rojhilatê Sûriyeyê bigire û kuştina sivîlan rawestîne, biryareke cidî bigire û helwsta xwe nîşan bide.”
