Roj Mehmûd/ Qamişlo
Jina ciwan Meryem Elî diyar kir ku siwarbûna hespê yek ji awayên dermankirina gelek nexweşiyên derûnî ye, di nav wan de nexweşiya Otîzimê, herwiha ew di pêşvebirina tendirustiya giyanî û derûnî de rolek baş dilîze.
Li Çandîngeheke nêzî bajarê Qamişlo, jina ciwan ya bi navê Meryem Elî ku temenê wê 26`salî ye, bi malbata xwe re hespan xwedî dike, herwiha fêrbûna siwarbûna hespan jî dide.
Jiyana Meryem Elî
Meryem Elî bal kişand li ser eşqa xwe ya ji bû siwarbûna hespan û wiha got: “Di sala 2021`an de ez fêrî siwarbûna hespê bûm, despêka wê tirsa min gelekî jê hebû ku ez nêzî siwarbûna hespê bibim tevî ku xeyalên min yên kevin bû jî, lê gelekan piştgiriya min kir ku ez bighêjim armanca xwe, min sînorê tirsê derbas kir û hezkirina min ji hespê re
çêbû, niha ez zarok û jinan û xûrtan fêrî siwarbûna hespê dikim, kursên fêrbûnê ji 15`rojan heta mehekê dirêj dike. Her kesayetek li gorî zîrekbûna xwe dema fêrbûnê diyar dibe.”
Kar û xebatên Meryem Elî
Meryem Elî di setên sibehê de li yek ji nexweşxaneyên Qamişlo kar dike û piştî nîvro jî serperiştiya perwerdekirina komek zarokên ji 6 salî û jûr de fêrî siwarbûna hespan dike. Sedema hilbijartina siwarbûna hespan, ew e ku hesp dibistaneke ku mirov jê fêrî nirxên hêja yên wekî xwebawerî, hêz, sebir û dilsozî dibe.”
Meryem Elî ji me re behsa qonax û gavên perwerdehiyê kir
Meryem Elî ji me re behsa qonax û gavên perwerdehiyê kir û axaftina xwe wiha qedand: “Destpêkê di navbera kesê fêr dibe û hespê de têkiliyek çêdibe, ew têkilî ji axaftina bi hespê re dest pê dike bêyî ku lê siwar bibe, piştî wê li hespê siwar dibe, piştî ku xwe bi hespê dide naskirin û hespê dimeşîne, bi tena serê xwe diqede. Jêhatîbûn di heyamekê de bi qasî 20 rojan tê texmîn kirin. Di warê fêrbûna siwarbûna hespê de ferqek di navbera zarok û mezinan de heye, li gorî wê zarokê ji mezinan zûtir hîn dibin, wêrektir in û çalaktir in.”
