Diyana Mistefa/Reqa
Înîsiyatîfa Gel a Kantona Minbic, Tebqa û Reqayê sibe li bajarê Reqayê bi dirûşmeya “Ji Krîza Sivîl ber bi Şaristaniya Demokratîk ve” wê konferansekê lidar bixin.
Înîsiyatîfa Gel li kantonên Minbic, Tebqa û Reqayê piştî organîzekirina gelek dewreyên xwendinê li her sê kantonan, ji bo nîqaşkirina pirsgirêk û çareseriyên ku ji aliyê Rêber Abdullah Ocalan ve hatine pêşniyarkirin, xwe amade dike ku konferansekê ji bo xwendevanên remanên Rêber Abdullah Ocalan li dar bixe.
Li gorî komîteya amadekar a konferansê, zêdetirî 180 xwendevanên remanên Rêber Abdullah Ocalan li herêmên navborî dê beşdarî konferansê bibin, ku wê sibe li salona Mişwar a bajarê Reqayê bê lidarxistin.
Di konferansê de di bin diruşmeya “Ji kirîza şaristaniyê ber bi şaristaniya demokratîk ve” dê du bend werin nîqaşkirin, ya yekem (pirsgirêkên civakî ji pirtûka çarem a Rêber Apo, bi sernavê(Krîza şaristaniyê û çareseriya şaristaniya demokratîk li Rojhilata Navîn).
Derbarê xala duyemîn de jî beşdar dê li gorî remanên Rêber Abdullah Ocalan rêyên çareseriyê binirxînin.
Tê plankirin ku di konferansê de komek pêşniyarên ku li ser bên xebitandin werin pêşkêşkirin.
