Diyana Mistefa/Reqa
Rêveberiya Çand û Şûnewaran a Rêveberiya Xweseriya Demokratîk a Bakur û Rojhilatê Sûriyê di bin dirûşmeya “Li Ber Ritma Rengên Sûriyê” 9’emîn pêşangeha salane ya Hunera Şêwekariyê lidar xist.
Di pêşangehê de 80 hunermend ji hemû bajarên Bakur û Rojhilatê Sûriyê û herêmên Sûriyê beşdar bûn. Di pêşengehê de nêzî 100 tabloyên hunerî ku qonaxên kirîza Sûriyê, geşbûn û vejînê li herêmên Bakur û Rojhilatê Sûriyê vedihewîne, hatin pêşandan.
Di vekirina pêşangehê de hevserokatiya Rêveberiya Xweseriya Demokratîk a Bakur û Rojhilatê Sûriyê, hevserokatiya kantona Reqa, hevserokatiya Rêveberiya Çand û Şûnewaran ya Bakur û Rojhilatê Sûriy û endamên saziyên sivîl û leşkerî amade bûn.
Piştî birîna korta vekirinê, Cîgirê Hevserokatiya Rêveberiya Xweseriya Demokratîk a Bakur û Rojhilatê Sûriyê Cebraîl Şemûn bixêrhatina beşdaran kir û got: “Em her sal di vê rojê de vekirina pêşangeha hunera Şûnewar li ser asta Herêma Bakur û Rojhilatê Sûriyê, bi beşdariya hunermendên ji hemû bajarên Sûriyê ji bo pêkanîna aştiyê li welatê me lidar dixin.”
Piştre hevserokê Desteya Çand û Şûnewar a Rêveberiya Xweseriya Demokratîk a Bakur û Rojhilatê Sûriyê Serferaz Şerîf vekirina pêşangehê pîroz kir û got: “Ez di wê baweriyê de me ku çand û huner canê me digihîne hev.”
Paşê şêwekar wêneyî Muhened Ala El-Dîn ji bajarê Laziqiyê spasiya Rêveberiya Çand û Şûnewar kir ku derfet daye wî ku beşdarî pêşangehê bibe.
Beşdaravan li dora pêşangehê geriyan û her şêwekarek li ser tabloyên xwe, çi sembol û çi îfade dike ji temaşevanan re şîrove kir.
Ev pêşangeh yekem car tê dîtin ku şêwekarên ji hemû bajarên Sûriyê hatine gel hev.
Hêjayî bibîrxistinê ku pêşengeh wê sê rojan berdewam bike.
