Ronaz Silêman/Qamişlo
Bi Boneya ‘Heftiya Avê’ Rêveberiya Xwecihî û Rêveberiya Giştî ya Avê ya Kantona Cizîrê derbarê pirsgirêka avê û rêya çareserkirinê komxebatek li hola Nêrgiz ya bajarê Qamişlo li dar xist.
Bi boneya Heftiya Avê, Rêveberiya Xwecihî û Rêveberiya Giştî ya Avê bi tevlîbûna endamên deste, meclis yên Rêveberiya Xweser û Rêxistinên Civaka Sivîl, bi diruşmeya ‘Av û Aştî Hevkariyeke bihêz ji bo pêşerojeke geş’ komxebateke li hola Nergiz Kafê ya bajarê Qamişlo li dar xist. Komxebat li ser gelek bendan hat şîrovekirin û nirxandin. Herwiha berî destpêkirina komxebatê xuleyeke bêdeng li ser giyanê şehîdan hat rawestandin.
‘Pirsgirêka avê bûye pirsgirêkeke cîhanî’
Pişt re axaftina destpêkê ji aliyê hevseroka Giştî ya Desteya Şaredariyan a Kantona Cizîrê Bêrîvan Omer hat kirin û wiha got: “Pirsgirêka avê ne tenê pirsgirêka Bakur û Rojhilatê Sûriyê ye, lê di heman demê de bûye pirsgirêkeke cîhanî ku em çawa avê peyda bikin û bihêlin av neyê qutkirin. Herwiha tê gotin ku wê demek bê ku şer li ser avê bên rûdan, ev yek niha jî li Bakur û Rojhilatê Sûriyê pêk tê, ji ber av bûye mijarek siyasetê û li dijî mirovan tê bi kar anîn. Niha jî pirsgirêka avê ya herî zêde li bajarê Hesekê tê jiyankirin, lê em weke Rêveberî bi hemû hewldanan hewl didin ku vê pirsgirêkê çareser bikin. Û ne tenê bajarê Hesekê, li giştî Bakur û Rojhilatê Sûriyê lêkolînên û hewldanên me li ser van pirsgirêkan heye. Ji xwe herî dawî jî lêkolîna me li ser ava binerdê hebû, ew jî metirsiyeke diyar dikir, ji ber weke ku diyare ava binerd dawîbûn lê heye, lewra pêwîste bi baldarî av bê xerckirin.”
Piştî wê, ji aliyê Hevseroka Hevbeş a Desteya Giştî ya Avê Bêrîvan Silo ve girîngî û çavkaniyên avê yê kantona Cizîrê hat nirxandin, herwiha ji aliyê Dr. Zanista Biyolojîk ê Zanîngeha Rojava Nîzar Xilêf ve rewşa ava binerdê ya Bakur û Rojhilatê Sûriyê hat şîrovekirin, di heman demê de ji aliyê lêkolînerê di warê teknolojiyên avdana nûjen de Emîn Erefat ve, bandora rêbazên avdanê li ser ava binerd nirxandin hat kirin, piştre têkiliyên jinê bi avê re ji aliyê Rêveberiya beşê Jinolojî ya Zanîngeha Rojava Zozan Mihemed ve nirxandin hat kirin, herwiha senefizyonek li ser girîngiya av û jêngehê hatpêşandan,
herî dawî komxebat bi giftigo û pêşniyaran hat bidawîkirin.
