Hemza Sêvo/ Qamişlo
Rêveberiya Zanîngeha Rojava di xeleka dawîn ji xelekên perwerdeyên mamoseteyên zanîngehê ya havînê de komxebatek li Zanîngeha Rojava li dar xist. Mamoste Nûjîn Hesen da zanîn ku armanc ji komxebatê, danasîna Rêber Apo û felsefeya wî bo mamosteyan e.
Rêveberiya Zanîngeha Rojava di xeleka dawîn ji xelekên perwerdeya mamoseteyên zanîngehê ya demsala havînê de komxebatek li Zanîngeha Rojava a li Taxa Hilêliyê li dar xist.
Komxebat li ser 4 panêlan hate dabeşkirin û bi dehan mamosteyên zanîngehê bi hemû fakulteyan û mêvanên cuda jî tevlî bûn.
Di destpêka komxebatê de hemû kesên beşdar tevlî xuleya rêzgirtinê bûn, herwiha li ser navê Komîteya Amadekar a
Zanîngeha Rojava, Aram Hesen bixêrhatina hemû beşdaran kir û komxebat hat destpêkirin.
Panêla yekem di derbarê danasîna jiyana Rêber Apo, fikr û felsefeya wî, xebata ji bo kurd, Kurdistan û cîhanê tevî. Ev panêl ji aliyê berdevkê Insiyatîfa Sûrî ya ji bo azadiya Rêber Abdullah Ocalan Ferzende Munzir ve hate pêşkêşkirin.
Naveroka panêla duyem jî li ser xebatên Komîteya Rêber Apo li ser asta cîhanê bû û ji aliyê endama Insiyatîfa Sûrî ya ji bo azadiya Rêber Abdullah Ocalan, Nûha Umer ve hat rêvebirin.
Piştre jî panêla sêyem a bi serenavê ‘Êrişên Hêzên Hegemonîk li ser Paradîgma Rêber Apo’ ji hêla endamê Akademiya Abdullah Ocalan a Zanistên Civakî, Zerdeşt Baran ve hat pêşkêşkirin. Herwiha girêdayî her panelekê pirs, bersiv û guftûgo ji di navbera beşdaran û panêlvanan de çêdibûn.
Herî dawî şêwirmendê Fakulteya Zanistinê Siyasî ya Zanîngeha Rojava, Yasîn Sûmiya têkildarî Konfedralîzma Demokratîk panêla dawîn da.
Girêdayî komxebata ku hat li darxistin, mamoste Nûjîn Hesen ji rojnameya me re axivî û wiha got: “Ji destpêka ku Zanîngeha Rojava hatiye damezrandin, perwerdeyên havînî ji bo mamosteyên zanîngehê yên hemû beş û fakolteyan tên dayîn. Herwiha mamoste jî bi coş û girseyîteke mezin tevlî van perwerdeyan dibin. Perwerde bi mijarên cihêreng ji aliyê rêveberiya Zanîngeha Rojava ve tê dayîn. Semînerên ku tên dayîn girêdayî şoreşa 19’ê Tîrmehê, jin û Jineolojî, siyastet û hwd… in. Hêjayî bibîrxistinê ye li tevahiya zanîngehên Bakur û Rojhilatê Sûriyê perwerde ji bo mamosteyan tên dayîn. Îro jî li Zanîngeha Rojava bi komxebatekê tê bidawîkirin, 8 xelekên perwerdeyê bûn û mamoste li ser asta Kantonê tevlî dibûn. Hem jî bi komxebatekê ev perwerde tên encam dan, armanc jê ew bû ku hemû mamoste jiyannameya Rêber Apo, fikrê wî û girîngiya felsefeya Rêber Abdullah Ocalan baş nas bikin. Hemû panêlên ku hatin lidarxistin xwedî girîngiyeke mezin in ji bo civakê bi taybet panêla Konfedralîzma Demokratîk û Xweseriya Demokratîk ku ev herdu rêgez ji tewriyetê ber bi piratîkiyetê ve diçe li Bakur û Rojhilatê Sûriy û bandora xwe li cîhanê bi giştî kiriye.”
