Yasmîn Omo / Hesekê
Endam Komîteya Amadekar ya kongireya 5’mîn ya Tevgera Civaka Demokratîk TEV-DEM Kurdyar Dirêyî diyar kir ku TEV-DEM dikeve rewşeke nû û ji xebata civaka sivîl berê xwe dide rêxistinên civaka Demokratîk di herêmê de.
Tevgera Civaka Demokratîk (TEV-DEM) kongireya xwe ya 5`mîn bi durûşmeya ‘Rêxistinên civaka demokratîk misogeriya azadî, edalet û wekheviyê ne’ li bajarê Hesekê bi beşdariya 500 endamên saziyên sivîl, tevgerên siyasî û rêxistinên civakî li dar xist. Di kongireyê de rapora salê ya tevgerê, perspektîfên siyaseta nîştimanî û rêzikname hatin xwendin. Her wiha rêzikname hat nîqaşkirin û hin guhartin hatin çêkirin. Di heman demê de Ebduselam Mehmûd û Remziye Mihemed wek hevserokên nû yên tevgerê hatin hilbijartin û endametiya 100 kesan ji bo Meclisa Giştî hat pejirandin.
Derberê 5’emîn kongeriya TEV-DEM’ê Endamê Komîteya Amadekar ya kongreyê Kurdyar Dirêyî ji Rojnameya me re axivî.
Endam komîteya Amadekar ya kongireya 5’mîn ya Tevgera Civaka Demokratîk TEV-DEM Kurdyar Dirêy di destpêka axaftina xwe de wiha got:
“Avabûna TEV-DEM’ê ne ji roja îro de ye, ji destpêka kirîza Sûriyê de TEV-DEM hate avakirin, di wê demê de avakirina TEV-DEM weke bersivekê bû ji bo rewşa ku Sûriyê têde derbas dibû. Wê demê civak di nava xeter û metisiyê de bû, piştî derketina şerê çekdarî û fikrên terorî, TEV-DEM xwe dît berpirsiyarê di ber civakê bi giştî de, ne tenê di ber civaka kurdî de.”
Kurdiyar Dirêyî axaftina xwe wiha domand: “TEV-DEM Li kêleka kar û xebatên civakî karê siyasî jî dide meşandin, di heman demê de ji bo pêkanîna hevrêziya kurdî jî TEV-DEM gelek kar û xebat da meşandin. Ji bo pêkanîna siyaseta demokratîk li Bakur û Rojhilatê Sûriyê jî gavên ber bi çav avêtine. Piştî avabûna Xweseriya Demokratîk jî TEV-DEM gelek yekîtiyên di nava civaka sivîl de da avakirin, ev di qada civakî de gaveke pir girîng bû.”
Kurdiyar Dirêyî axaftina xwe wiha qedand: “Bi lidarxistina kongreya 5’emîn, TEV-DEM dikeve rewşeke nû, xebata civaka sivîl berê xwe dide rêxistinên civaka Demokratîk di herêmê de. Piştî avakirina Konfidraliya Saziyên Rêxistinên Dmokratîk di herêmê de, TEV-DEM weke yek ji avakerê rêxistinê ye û wê têde xebatên xwe bimeşîne . TEV-DEM hewil dide bibe weke Tevgera Rêxistinên Civaka Demokratîk di herêmê de û xebata xwe di nava konfidraliyê de berdrwam bike ,TEV DEM xwe nabîne weke mûxalif ji Rêveberiya Xweser re lê em a xwe dibîne weke piştger û hevkarê vê avakirinê û wê têde xebateke mezin bimeşîne.”
