Hemza Sêvo/ Qamişlo
Îro Meclisa Malbatên Şehîdan û şêniyên Qamişlo ji bo şehîdên teqîna taxa Xerbî merasîmek li taxa Xerbî li dar xist û tê de şehîdên teqînê bi mûman bi bîr xistin.
Di 27’ê Tîrmeha 2016’an çeteyên DAIŞ’ê li taxa Xerbî ya bajarê Qamişlo bi kamyoneke bombebarkirî êriş pêk anî. Di encama vê teqînê de, 62 kes şehîd ketin û 177 kes jî birîndar bûn herwiha zirar gihaşt mal, milk û dikanên welatiyan.
Bi vê boneya bi êş ku 8 sal di ser re derbas bûn Meclisa Malbatê Şehîdan û şêniyên Qamişlo di seet 7’ê êvarê de dest bi bîrxistina şehîdan kirin.
Di destpêkê de hemû kesên hazir tevlî xuleya rêzgirtinê bûn û piştre kurtebuyera komkujiya teqîna taxa Xerbî ji aliyê Meclisa Malbatên Şehîdan ve hat gotin. Di rêveçûna merasîmê de endamê Meclisa Malbatên Şehîdan Mihemed
Emîn Ibrahîm da zanîn armanc ji teqînê şikandina vîna gelên Qamişlo bû û xwestin tirsekê bixin nava dilê gelên wê, bi taybet gelê kurd. Lê komên çete nizanîbûn ev gel xwedî felsefe, tevger û hêz e. Herwiha şehadet ji bo me weke gelê kurd tiştekî pîroz e û wê hertim ev gel li ber xwe bide û ji bo azadiyê têkoşînê bidomîne.
Piştre jî helbestek girêdayî şehadetê ji aliyê Rêxistina Stêrk a Mafê Zarokan ve bi riya zarokekê hat xwendin.
Herî dawî li gel tilîlî û rondikên malbatên şehîdan, mûmên azadiyê bi destê jin kal pîr û zarokan hatin pêxistin.
