Reşo Mihmed/ Qamişlo
Bi pêşandana zedeyî 100 berhemên ku bi ramanên jinan hatine çêkirin, Weqfa Jina Azad pêşangehek li bajarê Qamişlo vekir û tê de salvegera 13’emîn a Şoreşa 19’ê Tîrmehê pîroz kir.
Îro, Weqfa Jina Azad a Sûriya bi armanca pêşandana berhemên ku bi destê jinên azad hatine çêkirin, pêşangehek li navenda xwe ya taxa Hilêliyê vekir.
Di vê pêşangehê de bêtirî 200 berhemên ku ji aliyê jinan ve hatine çêkirin hatin pêşandan. Berhemên ku hatibûn çêkirin; peykerên biçûk ji mezarên şehîdan, peykerên çiyayên Kurdistanê û berxwedana Gerîlayên Azadiyê, wêne, amûrên çandî yên kevnar, wêne û hwd… Herwiha
hejmara jinên ku tevlî pêşangehê bûne 8 jin in û ev jin ji tevahiya Bakur û Rojhilatê Sûriyê bi hemû pêkhateyan beşdar bûne.
Di destpêkê de berî ku pêşangeha were vekirin rêvebera Weqfa Jina Azad a Sûriya Siltana Xişo wiha got: “Bi boneya Şoreşa Rojava me weke jinên azad xwest balê bikşînin li ser berhemên ku jinê bi fikr û ramanên azad hatine afrandin. Herwiha em rola jinê û keda wê di pêşveçûna şoreşê de bidin diyarkirin. Bi rastî jinê di vê şoreşê de gelek xebatên bi nirx da meşandin û tevlî hemû waran bû, ji wan xebatan jî; ev pêşangeh e. Em bi vê boneyê xebata jinê li tevahiya jinê pîroz dikin. ”
Piştî wê jî bi stran û çepkan pêşangeh hat vekirin û hin rêxistinên cuda, saziyên Rêveberiya Xweser serdanan vê pêşangehgê kirin. Hêjayî bi bîrxistinê ye ku li ser asta 2 rojan tê domandin.
