Lîloz Hisên/Qamişlo
Koma strana ya bi navê Yekpar ji bo bîranîna Dengbejê navdar Şakiro li Navenda Mihemed Şêxo ya Çand û Hunerê ya Qamişlo konserek bi navê” Şakiro“ li dar xist.
Dengbejê Kurd yê nemir Şakiro di sala 1936`an li Agirî ya bakurê Kurdistanê yê herêma Serhedê ji dayik bûye, awaz û stranên Şakiro sînor şikand û li her çar parçeyên Kurdistanê belav bû, di nava astengîyên dagirkeriyê de 6’ê Gulana hezar û 996’an li Izmîr’ê koça dawî kir.
Îro navenda Yekpar li bajarê Qamişlo bi riya konsertekê û bi rengekî cuda berhemên Şakiro li navenda Mihemed Şêxo ya Çand û Hunerê li
dar xist.
Konsert bi deqeyek rêzgirtinê li ser gora şehîdan destpê kir, piştre bi xêrhatina mêvanan hate destpêkirin û li ser navê TEV-ÇAND’ê Ebdul Mecîd Xelef axivî.
Ebdul Mecîd Xelef dengbêjê kurd Şakiro bi bîr anî û wiha anî ser ziman: ” Kêm dengbêj mîna Şakiro hebûn ku karîbûn xwe bikin sembol li pêşiya gelê xwe û dengê xwe her li çar parçeyên Kurdistanê belav bikin, û bibin dengbêjekî Kurdistanî.”
Piştî bidawîbûna axaftinan sînevîzyonek li ser jiyana dengbêj Şakiro hat pêşkêşkirin û her wiha koma Yekpar stranên dengbejê nemir gotin û helbest ji hêla Helbestvan Dilyar Osê ve hate pêşkêş kirin û di dawî de jî pêşbirkek di derbarê jiyana dengbêj Şakiro çêbû.
Di konsertê de helbestvan Dilyar Osê ji hêla Koma Yekpar ve hate xelatkirin.
Hêjayî gotinê ye ku hunermend Şakiro bi şêwazê huner û dengbêjiya xwe di dilê hemû Kurdistanîyan da cih girtiye û weke Mihemed Şêxo, Aram Tîgran muhra xwe li dîrokê xistiye.