Lîloz Hisên/ Qamişlo
Hevseroka Dayîreya Avê ya kantona Qamişlo Delal Seyid Hemo diyar kir ku ji dema ku dewleta Tirk a dagirker êrîşên xwe yên hewayî li ser Herêma Bakur û Rojhilatê Sûriyeyê pêkanîbû tevahî riyên jiyanê kir armanc, civak ji elktrîk, av û xizmetên sereke qut kirin.
Di dawiya Mijdara sala 2023`an, dewleta Tirk a dagirker êrîşeke hewayî li ser Herêma Bakur û Rojhilatê Sûriyayê pêk anî, di encamê de av û elktrîk li ser milyonan kesan hate qut kirin. Di heman demê de dagirkeriya Tirk stasyonên avê, elktrîk, neft û xazê bi temamî hedef girtin, ev bandorên êrîşê heta niha berdewamin li hin deveran, pirsgirêka kêmbûna avê mijara tevahî şêniyên herêmê ye. Şênî gelek astengiyan dikşînin li hin deveran jî bi temamî av tune ye û li hin derevan av kême, şênî êdî neçar dimînin her roj tangêrên avê bikrin da ku debara xwe ya jiyanê bikin.
Derbarê mijara kêmbûna avê de hevseroka Dayîreya Avê ya kantona Qamişlo Delal Seyid Hemo ji rojnameya me re axivî.
Delal Seyid Hemo wiha got: ” Ji dema ku dewleta Tirk a dagirker êrîşên xwe yên hewayî li ser Herêma Bakur û Rojhilatê Sûriyeyê pêkanîbû tevahî riyên jiyanê kir armanc, civak ji elktrîk, av û ji xizmetên sereke qut bikin.“
Delal Seyid Hemo destnîşan kir ku Êrîşên dewlet Tirk a dagirker li ser herêmê bandoreke pir mezin li ser ava herêmê kir û wiha domand: ” Em hewildanên xwe dikin da ku avê bi awayekî rêxistinkirî ji gel re peyda bikin, di encama êrîşa dagirkeriya Tirk stasyonên avê ji xizmetê derkeve û bi tunebûna elktrîkê em neçar man ku jenertoran bi kar bînin da ku stasyonên avê têkevin xizmetê.
Delal Seyid Hemo got: “Sê stasyonên sereke li bajarê Qamişlo hene ya Hilêliyê 51 bîr di xizmetê de ne, ya Ceqceq, û ya Iwêca.”
Delal Seyid Hemo da zanîn ku ew ji bo peydakirina avê proje dane destpêkirin û wiha pê de çû: ” Me 14 projeyên avê dane detpêkirin, yek ji wan projeyan veqetandina toreyê ye yanî roja taxa Şerqî wê av tenê ji bo wê taxê be, her roj ji taxekê re bê diyar kirin. Her wiha wê bername bê danîn ji bo li gorî seatên Ampêran avê bixin xizmetê ji bo gel re.”
Delal Seyid Hemo diyar kir ku ji bo taxên toreyên avê lê tune be wê tore bên avakirin. Û tekez kir ku ji bo çareserkirina pirsgirêkên avê li taxan divê gel dayîreya agahdar bike da ku pirsgirêkan çareser bike.
Hevseroka Dayîreya Avê ya kantona Qamişlo diyar kir ku du stêrên avê hene, gel bi wan re têkiliyan dikin da ku ji wan re avê bişênin.”