Jinên Helebceyî di hemû waran de xwedî jêhatin û kedeke mezin in. Her wiha bi hunera xwe ya dest re hewl didin nasnameya xwe ya Kurdewarî û jinbûna xwe biparêzin û nîşanî civaka xwe bidin.
Huner amûreke piralî û bibandor e ku bi rêya wê şoreşeke civakî û rewşenbîrî tê meşandin. Her wiha ji bo parastin û zindî kirina nasnameya neteweyî jî rêyek serekeye. Jinên ciwan ên ji vê reng û kêrhatina xwe ya hunerî bi tablo û wêneyên xwe nîşanî civakê dikin. Bi vê yekê jî çand û hunera Kurdewarî diparêzin û baldikişînin li ser rewş û hêza jinê.
Di vê çarçoveyê de li parêzgehên Herêma Kurdistanê ji bo pêşandan û nîşandana hêz û kêrhatinên jinan festîvalên cuda cuda têne lidarxistin. Yek ji wan parêzgehan jî ku di vî warî de bi tecrûbeye parêzgeha Helebceyê ye. Jinên Helebceyê yên ku di van festîval û pêşengehan de cih girtîn gotin ku; sozyar Mehmûd yek ji jinên hunermend ên Helebceyê ye. Sozyar peymangeha hunerên ciwan qedandiye û ev 10 salin bi vê karê ve mijûle. Wek Sozyar bi xwe dibêje dema ku wêneyên xwe xêz dike, bi yekkirina wan bi xwezayê re behsa rola jinan û bedewî û nazikiya wan dike.
Sozyar Mehmûd wiha axaftina xwe domand: “Jin bi xêzkirina wêneyan dikarin civaka xwe pêş bixin. Dema mêvan di pêşangehan de tabloyan dibînin, dizanin ku jinên Kurd di warê wênesaziyê û hunerê de çiqasî pêşketî ne. Di warê hunera wênesaziyê de gelek jinên jêhatî hene, lê dabînkirina derfet û qadên guncaw kêmin. Her wiha pêşengehên ji bo jinan tên lidarxistin jî kêmin.”
Hunermendek din ya Helebceyê Pruşe Heyder ku ew jî ev 5 salin bi xêzkirina wêne û tabloyan ve mijûle, li ser heman mijarê axivî û wiha got: “Bi rêya tabloyên xwe yên hunerî, me kariye ku beşek biçûk jî be çanda xwe biparêzin. Bi nîşandana cil û bergên Kurdewarî çanda netewa xwe diparêzin.”
Pruşe jî balkişand li ser bêderfetiyên ku di warê nîşandana hunerê de li pêşiya jinan hene û wiha axivî: “Tevî ku jinên Helebceyê xwedî jêhatî û kêrhatinin, lê derfet kêmin ku bikarin jêhatin û hêza xwe nîşan bidin. Jin beşeke girîng a civakê pêktînin û divê her tim rola wan were nirxandin. Di heman demê de jin dikarin bi hunerên xwe bedewiyê belav bikin. Armanca me ew e ku em bedewiya civakê nîşan bidin.”