Ronaz Silêman/ Qamişlo
Desteya Tenduristiyê ya Kantona Cizîrê bi daxuyaniyekê projeya avakirina nexweşxaneya Jin û Zarokan a li bajarê Qamişlo ragihand.
Îro Desteya Tenduristiyê ya Kantona Cizîrê bi daxuyaniyekê pirojeya avakirina nexweşxaneya Jin û Zarokan li cihê pirojeyê ragihand. Ev nexweşxane wê li taxa Cimayê ya bajarê Qamişlo were avakirin, her wiha daxuyanî bi zimanê kurdî ji aliyê Hevserokê Desteya Tenduristiyê yê Kantona Cizîrê Xalid Dawid û bi zimanê Erebî jî, ji aliyê Hevseroka Desteya Tenduristiyê ya Kantona Cizîrê Measir Elibas ve hat xwendin.
Naveroka daxuyaniyê jî wiha bû:
Daxuyanî wiha hat destpêkirin: “Bi navê Rêveberiya Tenduristiyê ya Kantona Cizîrê me îro destpêkirina projeya Nexweşxaneya Jin û Zarokan ku yek ji projeyên jinan ên Encûmena Rêveber li Kantona Cizîrê ye. “
‘Proje di nava 465 rojan de wê were pêkanîn’
Nexweşxane ji sê qatan pêk tê û pêvekekê bi rûbera 2,800 metrên çargoşe û lêçûneke texmînkirî 2,045,000 dolare ev piroje wê di nava 465 rojan were pêkanîn, ji ber ku Kantona El-Cezîrê pêwîstiya wan bi pirojeyên bi vî rengî yên taybet heye.
‘Nexweşxaneya jin û zarokan ji bo xizmeta gel e’
Daxuyanî wiha bi dawî bû: “Ev piroje wê xizmeta hemû gelên herêmê pêk bîne.
‘Pêwîstî bi vê nexweşxaneyê heye’
Hevseroka Desteya Tenduristiyê ya Kantona Cizîrê Measir Elibas di derbarê vê projeyê de diyar kir ku ji ber pêwîstiya Kantona me ya Cizîrê bi nexweşxaneyeke bi vî rengî hebû û wiha got: “Di vê nexweşxaneyê de wê nêzî 100 textan hebe, di heman demê de wê mûçeyên wê kêm be, armnca me jê ew e, ku em projeyên bi vî rengî li pêş bixin.”
